BQO: evakýatsııalyq pýnktterde 2400-den astam adam qalyp otyr

<p>ORAL. KAZINFORM &ndash; Batys Qazaqstan oblysynda 12 evakýatsııalyq pýnktte 2 428 adam qalsa, sonyń 1 038-i &ndash; balalar.</p>

BQO TJ departamentiniń jedel shtabynan málim etkenindeı, oblys boıynsha osy kezge deıin barlyǵy 1 311 turǵyn úı, 15 166 saıajaı ýchaskesi sýǵa ketti.

Óńirde 8 avtojolda sý ótken 15 ýchaske baqylaýda tur. Sonymen qatar Terekti aýdanynda Aqsoǵym aýyly, Aqjaıyqta Tasoba eldi mekeni kólik qatynasynsyz qalyp otyr.

Sý tasqyny bastalǵannan beri barlyǵy 14 019 adam kóshirilse, sonyń 5 793-i – balalar. Qaýipsiz jerlerge 5 078 mal aıdaldy. Al 2 421 bas mal shyǵynǵa ushyrady.

Jedel shtabtyń málimetine qaraǵanda, 5 sáýirden beri gýmanıtarlyq kómek qabyldaý jónindegi oblystyq shtabqa 1 240,4 tonna gýmanıtarlyq júk jetkizildi.

Apattyq-qutqarý jumystaryna qazirgi kezde 2 626 adam, 946 tehnıka, 63 sý sorý quraly, 151 qaıyq, 1 tikushaq jumyldyrylǵan.

Oral qalasyndaǵy Shaǵan sý qoımasynyń jobalyq kólemi 19,10 mln tekshe metr bolsa, onda qazir 32,14 mln tekshe metr sý bar nemese 169,11 paıyzǵa toltyryldy.

Irekli sý qoımasynan 28 sáýirdegi málimet boıynsha Jaıyq ózenine sekýndyna 141 tekshe metr sý jiberilip jatyr. Jaıyqtyń Orynbor tusyndaǵy sý deńgeıi – 832 santımetr.

Eske sala keteıik, budan buryn Jaıyq ózeniniń deńgeıi Taıpaq aýylyndaǵy gıdrobekette 630 santımetrden asqanyn jazǵan bolatynbyz.