BQO dárigerlerine jańa baspana berildi

<p>QAZTALOV. KAZINFORM &ndash; Byltyr Batys Qazaqstan oblysynyń densaýlyq saqtaý salasynda biraz jetistikter men aýqymdy jobalar júzege asty. Atap aıtar bolsaq, Qaraoba dárigerlik ambýlatoııasy kúrdeli jóndeýden ótse, Qaraózen men Bostandyq aýyldaryndaǵy medıtsınalyq nysandar jańadan salynyp, el ıgiligine berildi. Munymen qosa, Kaztalov aýdanyna 8 jedel-járdem avtokóligi berilse, 761 mln teńge qarajatqa 51 túrli medıtsınalyq qural-jabdyqtar alyndy.</p>

Sondaı-aq Kaztalov aýdandyq aýrýhanasyn 2024-2025 jyldary japsarlas qurylys júrgizilip, kópbeıindi ortalyq aýrýhanaǵa aınaldyrý josparlanyp otyr.

Memleket basshysy Qasym-Jomart Toqaevtyń tapsyrmasyna sáıkes aýdanǵa Semeı, Túrkistan, Aqtóbe, Oral, Aqsaı qalalarynan jáne Jánibek aýdanynan kelgen 6 maman dárigerdi qyzmettik turǵyn úılermen qamtamasyz etý maqsatynda jańadan salynǵan 6 turǵyn úıdiń kiltin tabystady. 

Foto: Qaırat Jaqyp

Zamanaýı úlgidegi baspana qurylysy sapaly túrde aıaqtalyp otyr. Іshi jaryq ári jyly úılerdi jartylaı jıhazben qamtylǵan. Ár úıdiń jeke jylytý, káriz júıesi bar. Medıtsına salasynyń mamandaryna baspanalardyń kiltin tabys etý rásimine aýdan ákimi, aýdandyq máslıhat, aýrýhana ókilderi jáne aýyl turǵyndary qatysty. Іs-sharada aýdan ákimi Aslanbek Ahmetollauly mamandardy qonys toıymen quttyqtap, baspana kiltterin tabystady. 

Foto: Qaırat Jaqyp

Qonys toıyn toılap jatqan dárigerler qatarynda Túrkistan oblysynan kelgen jas maman, balalar dárigeri Ádilbek Qaldybekov te bar. Jas maman jańa úıine bas suqqan aýdan basshysyna alǵysyn aıtty. 

Foto: Qaırat Jaqyp

«Men byltyr jumys babymen Kaztalov aýdanyna Túrkistan qalasynan otbasymmen birke kóship keldim. Kelgen ýaqytta baspana máselesi qıyn bolyp, páter jaldaýǵa týra keldi. Turǵan páterimiz salqyn bolyp, balalarymyzǵa qolaısyzdyq týǵyzdy. Máseleni ońynan sheship, jańa úı salyp bergen, aýdanǵa kelgen mamandardy qoldap jatqan basshylarǵa alǵys bildiremin. Aldaǵy ýaqytta aýdan halqynyń densaýlyǵyn jaqsartýǵa aıanbaı eńbek etemin», - dedi ol.