BQO dárigerleri órt kezinde 4-qabattan sekirgen balalardyń jaǵdaıy jóninde aıtty

<p>ORAL. KAZINFORM — Aqsaı qalasynda kópqabatty úıdegi órt kezinde zardap shekken eki bala oblys ortalyǵyna jetkizildi.</p>

Budan buryn jazǵanymyzdaı, 22 qarasha kúni tańmen 4-qabatta páter órtenip, eki bala terezeden sekirgen edi.

BQO densaýlyq saqtaý basqarmasy baspasóz qyzmetinen málim etkenindeı, órt saldarynan 8 jáne 4 jastaǵy eki ul bala, 1981 jylǵy áıel Bórli aýdandyq aýrýhanasynyń jansaqtaý bólimine jatqyzylǵan bolatyn.

«Juma kúni keshkisin eki bala sanavıatsııamen Oral qalasyndaǵy oblystyq kópbeıindi balalar aýrýhanasyna jetkizildi. Qazirgi kezde ekeýi de travmatologııa bólimshesinde qajetti emin alýda. Al áıel 2-3-dárejeli 45-50 paıyz kúıik jaraqatyn alǵan. Kúni búgin Bórli aýdandyq aýrýhanasynyń jansaqtaý bóliminde emdelýde. Jaǵdaıy turaqty aýyr», — dep habarlady vedomstvodan.

Eske salsaq, ótken aptada Aqsaı qalasynda kópqabatty turǵyn úıde órt boldy. Saldarynan 2 bala, 1 áıel jansaqtaý bólimine jatqyzyldy.