BQO-daǵy jaryq máselesin sheshý úshin 3 mlrd teńgege jýyq qarajat qajet

NUR-SULTAN. QazAqparat – Senator Lázzat Rysbekova elimizdiń Premer-Mınıstriniń atyna joldaǵan depýtattyq saýalynda Batys Qazaqstan oblysyn jaryqpen qamtýdaǵy kúrdeli jaǵdaı týraly málimdedi.

Máseleni sheshý úshin 2020-2021 jyldary respýblıkalyq jáne jergilikti bıýdjetten 3 mıllıard teńgege jýyq qarajat bólinip, olar oblysta ıgerilip úlgermegendikten, bul qarjynyń bir bóligi bıýdjetke qaıtaryldy.

Lázzat Rysbekova jumystardy aıaqtaý úshin 1 mlrd 738 mıllıon teńge qajet ekenin aıtyp, bul qarjyny jylý elektr ortalyǵynyń týrboagregattaryn jóndeýge bólýdi surady. Áıtpese, oraldyqtar birqatar qıyndyqqa tap bolýy múmkin.

«Birinshiden, taǵy bir týrboagregat isten shyǵatyn bolsa, Oraldaǵy JEO-ǵa qaraǵanda elektr energııasyn baǵasy 1 kılovatt úshin joǵary bolatyn basqa energııa óndirýshi stantsııadan satyp alý qajettigi týyndaıdy, bul óz kezeginde óńirdegi elektr energııasy tarıfiniń ósýine alyp keledi. Ekinshiden, 2020-2021 jyldarǵa merdigerge avans tólendi. Jobany odan ári qarjylandyrý toqtatylǵan jaǵdaıda avanstyq tólemniń qaıtarylmaý qaýpi bar. Úshinshiden, osy joba aıasynda óndirýshi zaýyt týrboagregat daıyndaýdy is júzinde aıaqtady. Ony Oraldaǵy JEO-ǵa ornatý keshiktirilgen jaǵdaıda, óndirýshi zaýyt jabdyqty basqa satyp alýshyǵa satýǵa quqyly. Týrboagregatty qaıta daıyndaý 12 aıǵa sozylady», - dedi depýtat.