BQO-daǵy jol apatynda shaqalaq pen eki jasar sábı analarynan aıryldy

<p>Batys Qazaqstan oblysynda jol apatynan bir adam kóz jumyp, tórteýi aýrýhanaǵa jetkizildi, dep habarlaıdy <a href="https://kaz.inform.kz/" target="_blank" rel="noopener">QazAqparat tilshisi.</a></p>

BQO Polıtsııa departamenti baspasóz qyzmetinen túsken málimetke qaraǵanda, oqıǵa 26 qyrkúıek kúni Oral-Atyraý jolynyń 272-shaqyrymynda boldy.

"Mańǵystaý oblysynyń turǵyny, 22 jastaǵy júrgizýshi Toyota Camry avtokóliginiń rýline ıe bola almaı qalyp, 36 jastaǵy júrgizýshi (ol da Mańǵystaý oblysy Beıneý aýdanynyń turǵyny) aıdap kele jatqan Volvo júk kóligimen soqtyǵysýǵa jol bergen.

Saldarynan jeńil kólikte otyrǵan 23 jastaǵy kelinshek oqıǵa ornynda kóz jumdy. Onyń 2021 jáne 2023 jyly týǵan eki balasy men 26 jastaǵy er adam aýrýhanaǵa jetkizildi. Qazirgi kezde QR Qylmystyq kodeksiniń 345-baby 3-bóligine sáıkes sotqa deıingi tergeý amaldary júrgizilip jatyr», – dep habarlady vedomstvodan.

BQO Densaýlyq saqtaý basqarmasy baspasóz qyzmetiniń naqtylaýynsha, oqıǵa Aqjaıyq aýdany Taıpaq aýyly mańynda "Nur" janar-jaǵar maı quıý stanasy tusynda bolǵan. 23 jastaǵy kelinshek jedel járdem jetkenshe qaıtys bolǵan. Taıpaq aýyldyq aýrýhanasyna 4 adam tústi. Sonyń ishinde eki bala keıin oblystyq kópbeıindi balalar aýrýhanasyna sanavıatsııamen jetkizildi. Balalardyń jaǵdaıy ortasha aýyr. 26 jáne 22 jastaǵy naýqastar ambýlatorııalyq em alý úshin búgin úılerine jiberildi. Olardyń jaǵdaıy turaqty.