BQO-daǵy Uzynkól sý qoımasyndaǵy sý deńgeıi tómendep keledi

<p><strong>ORAL. KAZINFORM &ndash; 2024 jyldyń 7 sáýirinde vıtse-premer Nurlan Baıbazarov Batys Qazaqstan oblysyndaǵy sý basqan jáne sý basý qaýpi bar aýmaqtarǵa, sondaı-aq Oral qalasy mańyndaǵy saıajaılarǵa bardy.</strong></p>

Vıtse-premer óńirdegi negizgi sý arnasy – Jaıyq ózeninde sý tasqynynyń aldyn alý jumystarynyń barysymen tanysty. Sý deńgeıiniń kóterilýine baılanysty ózen jaǵasy qum salynǵan qaptarmen nyǵaıtylyp, aýyr tehnıkalar jumys istep jatyr.

Eske sala keteıik, Reseıdiń Batys Qazaqstan oblysyna jaqyn ornalasqan Saratov jáne Orynbor oblystaryndaǵy sý qoımalarynan úlken sý kelip jatyr. Atap aıtqanda, Saratov oblysyndaǵy Prıýzen sý qoımasynan Qaraózenge sekýndyna 300 tekshe metr sý kelip jatyr. Sondaı-aq Orynbordaǵy Irıkla sý qoımasynan sekýndyna 2 myń tekshe metrge jýyq sý jiberilýde. Bul sý jaqyn arada Jaıyq ózeni arqyly ótip, ári qaraı Kaspıı teńizine quıylady. Osyǵan baılanysty Jaıyq ózenindegi sý deńgeıi qalaǵa qaýip tóndiretin deńgeıge jetýi múmkin.

Sonymen qatar Terekti aýdanyndaǵy Uzynkól sý qoımasy tekserildi. Mundaǵy jaǵdaı qalypty, sý deńgeıi tómendep keledi. 

«Mamandar jaǵdaıdy únemi baqylaýda ustaýy kerek. Úkimet tarapynan barlyq qajetti kómek kórsetiledi», - dedi Premer-Mınıstrdiń orynbasary. 

Foto: primeminister.kz

BQO-daǵy 5 aýdanda jáne Oral qalasynda sý tasqyny saldarynan turǵyn úıler men saıajaılardy sý basty. Oblys boıynsha 7 myńǵa jýyq adam qutqaryldy.

Evakýatsııalyq pýnktterde barlyq qajetti jaǵdaı qamtamasyz etilgen, sý tasqynynan zardap shekkenderge myńdaǵan erikti kómek kórsetýde. Halyqqa azyq-túlik pen dári-dármek, kıim-keshek tasymaly, sondaı-aq kezekshilik uıymdastyrylǵan. Oqýshylar onlaın-formatta oqýyn jalǵastyryp jatyr.