BQO-da jylqyǵa soǵylǵan kólik apatyna baılanysty aýdan ákimine sógis jarııalandy

ORAL. QazAqparat – Batys Qazaqstan oblysynda kóliktiń jylqyǵa soǵylyp, bir otbasydan úsh adamnyń qaza tabýyna baılanysty Aqjaıyq aýdanynyń ákimi Qalııar Aıtmuhambetovke sógis jarııalandy. Bul týraly oblys ákimi Ǵalı Esqalıevtiń tóraǵalyǵymen ótken jol qaýipsizdigin qamtamasyz etý jónindegi keńes otyrysynda aıtyldy, dep habarlaıdy QazAqparat tilshisi.

Otyrysta BQO polıtsııa departamenti bastyǵynyń birinshi orynbasary Janbolat Janshınniń málim etkenindeı, Aqjaıyq aýdany aýmaǵynda 16 mamyr kúni túnde Oral-Atyraý jolynyda «VAZ-21113» avtokóligi eki jylqyǵa soǵyldy. Jol apatynda úsh adam mert boldy, onyń bireýi – jasóspirim. Taǵy ekeýi jaraqat aldy. Maldyń ıesi anyqtalǵan joq.

«Qaraýsyz júrgen malǵa avtokóliktiń soǵylýy toqtalmaı otyr. Ásirese, túngi ýaqytta joldyń boıynda júrgen mal qaýip tóndiredi», - dedi J.Janshın.

Óńir basshysy Ǵalı Esqalıev budan buryn da keńes otyrystarynda osy máseleniń qaralyp, aýdan ákimderine tıisti tapsyrma berilgenin jetkizdi.

«Malǵa qatysty jol-kólik oqıǵalaryn boldyrmaý maqsatynda qatań sharalar qoldaný jóninde, ásirese respýblıkalyq mańyzy bar joldar ótetin aýdandar ákimdikterine eskertildi. Soǵan qaramastan, Aqjaıyq aýdanynda bir otbasynyń úsh adamy qaza tapty. Osyǵan baılanysty aýdan ákimine sógis jarııalanady», - dedi oblys basshysy.

Keńeste sondaı-aq «Elektrondy baqtashy» qurylǵysyn engizý, maldy birdeılendirý, sonyń ishinde jylqyny tańbalaý baǵytynda tıisti jumystardyń atqarylýy qajettigi atap ótildi.