BQO-da jýrnalısterdiń sý basqan aımaqtarǵa kirýine tyıym salyndy
Óńirdegi tótenshe jaǵdaı rejımine baılanysty BAQ ókilderiniń sý basqan aımaqtarǵa baryp, belsendi jumys isteýi olardyń ómiri men densaýlyǵyna eleýli qaýip tóndiredi.
Qaýipti aımaqtarda qutqarý jáne evakýatsııa jumysyn tótenshe jaǵdaı, polıtsııa departamentteriniń, Ulttyq ulan jáne Qarýly kúshterdiń qyzmetkerleri júrgizip jatyr.
«Bul adamdar tótenshe jaǵdaı kezinde áreket etýge úırengen, al arnaıy daıyndyqtan ótpegen jandarǵa mundaı jaǵdaı óte qaýipti bolýy múmkin. Sizdiń ómirińiz ben densaýlyǵyńyzdyń qaýipsizdigi maqsatynda TJ kezeńinde sý basqan aýmaqtardyń táýekel aımaǵyna kirýge tyıym salynady. Sonymen qatar, ushqyshsyz ushý apparattaryn paıdalaný qaǵıdasyna sáıkes QR áýe keńistiginde tótenshe jaǵdaılardan qutqarýǵa qatysty is-qımyl jalǵasyp jatqan aýdandardyń mańynda nemese ishinde dron ushyrýǵa bolmaıdy» dedi BQO óńirlik kommýnıkatsııalar qyzmetinde ótken brıfıngte TJD ókili.
BAQ-ty, blogerlerdi foto jáne vıdeomen BQO boıynsha TJD baspasóz qyzmeti qamtamasyz etedi.
Oblysta halyqty jáne ózge de múddeli tulǵalardy sý tasqyny jóninde aqparattandyratyn Batys TODAY aqparat shtaby jumys istep tur.
«Biz úshin azamattarymyzdyń qaýipsizdigi bárinen bıik turady, saq bolyńyz jáne ómirińizge qaýip tóndirmeńiz» dep túıindedi ókil.
Eske sala keteıik, Batys Qazaqstanda 11 aýylǵa Jaıyqtan qater tónip tur.