BQO-da JRVI-men aýyrǵan oqýshylar sany 2 myńǵa jýyqtady

<p>ORAL. KAZINFORM &ndash; Batys Qazaqstan oblysynda bıylǵy 1 qazannan bastap 47 464 adamnyń jiti respıratorlyq vırýsty ınfektsııalarmen (JRVI) syrqattanǵany tirkeldi.</p>

BQO sanıtarııalyq-epıdemıologııalyq baqylaý departamenti basshysynyń mindetin atqarýshy Nurlybek Mustaevtyń óńirlik kommýnıkatsııalar qyzmeti alańynda ótken brıfıngte málim etkenindeı, JRVI boıynsha epıdemıologııalyq jaǵdaı ótken jylǵy osy kezeńmen salystyrǵanda, birdeı deńgeıde.

Nurlybek Ermekulynyń sózine qaraǵanda, aýyrǵandardyń 33 543-i – 14 jasqa deıingi balalar, sonyń ishinde 557-si – 1 jasqa deıingiler. Sondaı-aq 118 júkti áıel, oblystyń 156 mektebinen 1 898 oqýshy tirkelgen.

– Tárbıe jáne bilim berý uıymdarynda aýyrǵandar sany barlyq oqýshylar sanynyń 30 paıyzynan asyp ketse, oqý protsesi ýaqytsha toqtatylady. Qazirgi ýaqytta 30 paıyzdan astam oqýshysy syrqattanǵan mektepter joq, – deıdi N.Mustaev.

Onyń aıtýynsha, epıdemıologııalyq kezeń bastalǵannan beri tumaýdyń A tıpiniń H1N1 túrine 36 adamnyń shaldyqqany tirkelse, sonyń ekeýi – júkti áıel. Sonymen qatar 4 jasqa deıingiler – 13, 4-15 jastaǵylar – 13, eresekter – 10. 

Tumaý tárizdes emes vırýstardan adenovırýs, rınovırýs, bokovırýs, paragrıpp, pandemııalyq emes koronavırýs anyqtaldy. 

– Kúni búginge deıin oblystyń 69 466 turǵyny tumaýǵa qarsy ekpemen qamtylsa, sonyń 3 087-si – sozylmaly aýrýy bar balalar jáne 21 067-si – eresekter, 7 947-si – medıtsına qyzmetkeri, 1 038-i – júkti áıelder, 455-i – oqýshylar. 1 466 adam jumys berýshiniń esebinen vaktsına aldy, – dedi N.Mustaev.

Eske sala keteıik, budan buryn BQO-da aýyl turǵynynan sibir jarasy anyqtalǵanyn jazǵan bolatynbyz.