BQO-da joldardy jóndeýge 14,6 mlrd teńge bólindi

ORAL. QazAqparat – Batys Qazaqstanda bıyl oblystyq jáne aýdandyq mańyzy bar joldardy jóndeýge respýblıkalyq jáne jergilikti bıýdjetten 14,6 mlrd teńge qarastyrylyp otyr, dep habarlaıdy QazAqparat tilshisi.

BQO jolaýshylar kóligi jáne avtomobıl joldary basqarmasynyń basshysy Aıdar Meńeevtiń málim etkenindeı, osy qarajatqa uzyndyǵy 215 shaqyrymnan asatyn joldy jóndeý kózdelýde.

Onyń aıtýynsha, barlyǵy 37 jobany júzege asyrý josparlansa, sonyń 20-sy 2021 jyldan aýysady, 17-si – jańa jobalar.

«Osylardyń ishinde kópten sheshimin tappaı kele jatqan, oblys turǵyndary úshin áleýmettik mańyzy erekshe joldar bar. Atap aıtqanda, Chapaev-Jańaqala-Saıqyn (130-191 km) baǵytyndaǵy joldy jóndeýge 1,5 mlrd teńge bólindi. Sol sekildi Bórli-Aqsaı-Jympıty (68-139 km) jolyn retke keltirýge 1,5 mlrd teńge qarastyryldy. Al Barbastaý-Aqjaıyq-Inder (43-93 km) jolyna 3,6 mlrd teńge jumsalmaqshy», dedi QazAqparat tilshisine A.Meńeev.

Ótken jyly memlekettik baǵdarlamalar aıasynda 30,2 mlrd teńgege 329,8 km jol jóndelse, sonyń 185,7 shaqyrymy – jergilikti joldar. 11 aýdanda oblystyq jáne aýdandyq mańyzy bar joldar boıynsha 36 joba júzege asyrylyp, sonyń nátıjesinde turǵyndardyń respýblıkalyq jáne oblystyq joldar arqyly oblys pen aýdan ortalyqtaryna qarym-qatynasy jaqsardy.

Eske sala keteıik, budan buryn Batys Qazaqstanda 31,7 mlrd teńgege jol jóndeý jumystary júrgizilip jatqanyn jazǵan bolatynbyz.