BQO-da jol apatynan qaza tapqan 2 adamnyń biri janyp ketti

<p>ORAL. KAZINFORM &mdash; Batys Qazaqstan oblysynda jol-kólik oqıǵasynan eki adam mert boldy.BQO polıtsııa departamentiniń baspasóz qyzmetinen málim etkenindeı, oqıǵa 1 qyrkúıek kúni túste Bórli-Aqsaı-Jympıty jolynda boldy.</p>

«Aldyn ala málimet boıynsha «Volkswagen Passat» avtokóliginiń júrgizýshisi basyp ozamyn dep, joldyń qarsy betine shyǵyp ketken. Sodan “Subaru” avtokóligimen betpe-bet soqtyǵysqan. Jol apaty saldarynan «Volkswagen Passat» otqa oranyp, júrgizýshi avtokólik ishinde janyp ketti. Sondaı-aq oqıǵa ornynda «Subaru» avtokóliginde otyrǵan jolaýshy kóz jumdy. Osy kóliktiń júrgizýshisi men úsh jolaýshysy túrli jaraqatpen aýrýhanaǵa jatqyzyldy. Atalǵan derek boıynsha QR QK 345-baby 4-bóligine sáıkes sotqa deıingi tergeý amaldary júrgizilýde», - dep habarlady vedomstvodan.

BQO densaýlyq saqtaý basqarmasynyń baspasóz qyzmeti aqparatty keıin beretinin jetkizdi.

Eske sala keteıik, budan buryn BQO-da jol apatynan aýyr jaraqat alǵan balanyń Oralǵa jetkizilgenin jazǵan bolatynbyz.