BQO-da joǵalyp ketken jasóspirimniń denesi ózennen tabyldy

<p>ORAL. KAZINFORM &ndash; Batys Qazaqstan oblysynda joǵalyp ketken jasóspirimniń denesi eki kúnnen keıin Jaıyq ózeninen tabyldy.</p>

BQO TJ departamentiniń baspasóz qyzmetinen málim etkenindeı, 8 shilde kúni Terekti aýdany Qabyltóbe aýyly tusynda jedel qutqarý jasaǵynyń kúshimen 2008 jylǵy jasóspirimniń denesi ózennen shyǵaryldy. Marqum kıimsheń kúıinde bolǵan. 

«Atalǵan jasóspirim 6 shilde kúni demalys kezinde belgisiz jaǵdaıda joǵalyp ketken. Ólimniń sebebi anyqtalyp jatyr. Polıtsııa departamenti sot-medıtsınalyq saraptama taǵaıyndady», - dep habarlady vedomstvodan. 

Terekti aýdany TJ bóliminiń basshysy Nursultan Serikovtiń naqtylaýynsha, jasóspirim jazǵy demalys kezinde Aqtaý qalasynan osy aýdandaǵy týma-týysqandaryna qydyryp kelgen. 

Eske sala keteıik, budan buryn Batys Qazaqstanda jol apatynan tórt adamnyń mert bolǵanyn jazǵan edik.