BQO-da jerdi óz betimen ıelengenderge 22 mln teńge aıyppul salyndy
BQO jerdi paıdalaný men qorǵalýyn baqylaý basqarmasynyń basshysy Salaýat Nurǵalıevtiń aıtýynsha, 2017 jyly jalpy kólemi 110,0 myń gektar aýyl sharýashylyǵy maqsatyndaǵy egistik, jaıylymdyq jáne shabyndyq alqaptarǵa tekserý júrgizilip, nátıjesinde jalpy kólemi 97,0 myń gektardy quraıtyn 84 jer teliminiń ıesine maqsatty paıdalaný qajettigi jóninde nusqamalar berildi. Basqarma paıdalanylmaǵan jer telimderine berilgen nusqamalardyń oryndalý merzimi aıaqtalyp, ıgerilmegen jaǵdaıda jerdi qaıtarý jóninde sot organyna júginedi. Búgingi kúni jalpy kólemi 15,0 myń gektardy quraıtyn 30 jer telimin memleket menshigine qaıtarý jóninde sot organynyń sheshimderi shyqty. 37,0 myń gektardy quraıtyn 92 jer teliminiń ıesi basqarmanyń bergen nusqamasynan keıin odan erikti túrde bas tartyp, memleket menshigine qaıtardy. Budan bólek 5,6 myń gektardy quraıtyn 7 jer telimin májbúrlep alý jóninde talap-aryzdar sotta qaralýda.
Qazirgi tańda basqarmanyń tekserý jumystarynyń nátıjesinde 52,0 myń gektardy quraıtyn 122 aýyl sharýashylyǵy jerleri memleket menshigine qaıtarylyp otyr. Basqarma sharýa qojalyqtarynan paıdalanylmaǵan jerlerdi qaıtarý máselesimen ǵana aınalyspaıdy, sharýashylyqtarǵa jer telimin maqsatty ıgerýge túrtki bolyp, bıznesti júrgizýge yqpal etý jumystaryn júrgizedi. Basqarmanyń zań buzýshylyqty joıý týraly bergen nusqamalarynan keıin kólemi 63,6 myń gektar jerdi jer paıdalanýshylar men ıeleri ıgerýge kirisip, aýyl sharýashylyǵy aınalymyna tartty.
Basqarma tarapynan júrgiziletin tekserýlerdiń nátıjesinde anyqtalatyn zańbuzýshylyqtyń biri - memlekettik jer telimin óz betinshe ıelenip alý. Bıylǵy tekseristerdiń nátıjesinde memlekettik jerdi basyp alý deregi boıynsha 71 jeke jáne zańdy tulǵaǵa ákimshilik hattamalar toltyrylyp, 22 mln teńge aıyppul salyndy.