BQO-da Jeńiske úles qosqan ardagerlerge birjolǵy kómek retinde 118,6 mln teńge bólindi

ORAL. QazAqparat - Batys Qazaqstanda Ekinshi dúnıejúzilik soǵysqa qatysýshylar men múgedekterine, olarǵa teńestirilgen tulǵalarǵa, tyl eńbekkerlerine jáne Jeńiske úles qosqan ózge de azamattarǵa birjolǵy materıaldyq kómek retinde oblystyq bıýdjetten 118,6 mln teńge bólindi, dep habarlaıdy «QazAqparat» tilshisi.

Oblystyq ishki saıasat basqarmasynyń basshysy Baqytjan Narymbetovtiń málim etkenindeı, qazirgi tańda óńirde 146 maıdanger qaldy. Sonymen qatar oblysta 8397 tyl eńbekkeri turyp jatsa, sonyń ishinde 1441-i - Uly Otan soǵysyna qatysýshylar men múgedekterine teńestirilgen tulǵalar (ofıtserlik quramda jáne basqa elderde qyzmet atqarǵandar, Lenıngrad qursaýynda jáne fashıstik kontslagerde tutqynda bolǵan adamdar) bar.   Atap aıtqanda, jergilikti bıýdjetten Uly Otan soǵysy ardagerlerine 150 myń teńgeden, tyl eńbekkerlerine 15 myń teńgeden, maıdangerler jesirlerine 20 myń teńgeden, zaıyptaryna 15 myń teńgeden berilýde.

Aıta keteıik, Jeńistiń 72 jyldyǵyna oraı oblys kóleminde josparly sharalar uıymdastyrylatyn bolady.