BQO-da jemqorlyq deregine baılanysty aýdan ákimi qyzmetinen ketti
BQO ákiminiń baspasóz qyzmetinen túsken málimetke qaraǵanda, ótken jyldyń aıaǵynda Shyńǵyrlaý aýdanynda bilim berý bólimi basshysyna qatysty jemqorlyq deregi tirkelgen bolatyn.
Osyǵan baılanysty Erjan Turmaǵambetov óz erkimen aýdan ákimi retindegi qyzmetinen ketý týraly sheshim qabyldap, ótinish bildirdi.
Oblys ákimi Erjan Rysjanulynyń ótinishin maquldady.
Jańa ereje shyqpas buryn oryn alǵan oqıǵa bolǵanymen, osyndaı qadamǵa barǵan E.Turmaǵambetov tájirıbesi mol memlekettik qyzmetshi retinde kadr rezervinde bolady.
QR Prezıdenti Ákimshiliginiń jáne aýdandyq máslıhat kelisimimen merıtokratııa qaǵıdasyna sáıkes Álııa Muhanbetjanova Shyńǵyrlaý aýdanynyń ákimi bolyp taǵaıyndaldy.
Álııa Bıǵazyqyzy 1978 jyly Oral qalasynda dúnıege kelgen. Bilimi joǵary. Batys Qazaqstan memlekettik agrarlyq ýnıversıtetin agrohımııa jáne topyraqtaný, M.Ótemisov atyndaǵy Batys Qazaqstan memlekettik ýnıversıtetin orys tili men ádebıeti, shet tili mamandyqtary boıynsha bitirgen.
Ár jyldary Zelenov (qazir Báıterek) aýdany Kojevnıkov orta mektebiniń muǵalimi, jer resýrstaryn basqarý jónindegi Zelenov aýdandyq bóliminiń jetekshi mamany, osy aýdanda aýyl sharýashylyǵy jáne jer qatynastary bóliminiń bas mamany, jer qatynastary bóliminiń basshysy qyzmetterin atqardy.
2014 jyldyń tamyz aıynan bastap BQO jer qatynastary basqarmasynyń basshysy boldy.
Eske sala keteıik, budan buryn BQO-da para aldy degen kúdikpen aýdandyq bilim berý bóliminiń basshysy ustalǵanyn jazǵan bolatynbyz.
Keıin A.Saparov sot úkimimen 3 jyl 6 aıǵa bas bostandyǵynan aıyryldy.