BQO-da jastar saıasatyn júzege asyrýǵa 369,1 mln teńge bólindi

ORAL. QazAqparat - Batys Qazaqstan oblysynda jastar saıasatyn júzege asyrýǵa bıyl 369,1 mln teńge bólindi. Bul týraly óńirlik kommýnıkatsııalar qyzmeti alańynda búgin BQO jastar saıasaty máseleleri basqarmasynyń basshysy Aıan Sakoshev málim etti, dep habarlaıdy QazAqparat tilshisi.

Onyń aıtýynsha, Aq Jaıyq óńirinde 14-29 jas aralyǵyndaǵy 145 myńnan astam jastar bar, bul - oblys halqynyń 22,9 paıyzy. Sonyń ishinde 22400-i tórt JOO-da oqıdy. Bıylǵy túlekter sany 7,5 myńnan asyp otyr. Sonymen qatar 19886 jas arnaýly orta oqý oryndarynda bilim alýda. «Máńgilik el jastary - ındýstrııaǵa!» jobasy aıasynda 1246 jas oqyp jatyr. Esh jerde jumys jasamaıtyn jastardyń úlesi - úsh paıyz, bul respýblıkadaǵy (ortasha kórsetkish - 9 paıyz) eń tómengi kórsetkish bolyp tabylady.

Batys Qazaqstanda 89 jastar birlestigi (64-i Oralda, 25-i aýdandarda) tirkeýden ótip, sonyń ishinde 35-i belsendi qyzmet atqarýda, Bıyl áleýmettik tapsyrys aıasynda 57 joba (28-i jastar saıasaty máseleleri basqarmasy, 29-y Oral qalasy men aýdandar ákimdikteri arqyly) júzege asyrylýda. Jyl basynan beri 4847 jas (847-si - qoǵamdyq jumysqa, 776-sy - kásibı oqytýǵa, 112-si - «Bıznes bastaý» jobasyna) jumysqa ornalastyryldy.

Jastar tájirıbesi aıasynda 1035 jas eńbekke aralasýǵa múmkindik aldy. «Dıplommen aýylǵa» baǵdarlamasy boıynsha 405 jas maman aýylǵa joldanyp, olarǵa 194,4 mln teńgeni quraıtyn kótermeaqy tólendi. 321 jas maman baspana satyp alý úshin 102,5 mln teńge jeńildetilgen nesıege qol jetkizdi. Sondaı-aq 841 jas «Jasyl el» baǵdarlamasyna tartylyp, stýdenttik qurylys otrıadtarynyń 128 sarbazy «Nurly jol» baǵdarlamasy aıasyndaǵy qurylys jumystaryna atsalysýda.  

Brıfıngte «Bolashaq» korporatıvtik qorynyń dırektory, oblystyq máslıhattyń depýtaty Saltanat Tumanbaeva 12 tamyz - Halyqaralyq jastar kúni aıasynda Oral qalasynda  ótken  «Aqjaıyq - fest» sharasy týraly keńinen aqparat berdi. Sonymen qatar qor qolǵa alǵan bolashaq basqarýshy kadrlardy ázirleý boıynsha «Bolashaq mansaptyq ósim» atty jobanyń mán-mańyzyn túsindirdi. «Bul - buryn-sońdy bolmaǵan joba. Endi jastar ózderiniń túıindemelerin qorǵa joldap, bazaǵa tirketip, oblystaǵy bos jumys oryndaryn usynǵan kompanııalarmen tikeleı baılanysa alady», - dedi S.Tumanbaeva.

Oblystyq «Jas Otan» jastar qanatynyń tóraǵasy Nurǵalı Joldasqalıev Oral qalasyndaǵy úsh kúndik aımaqtyq saıası lagerdiń maqsat-mindetteri týraly aıtyp berdi. «Jastar - Otanǵa!» atty alqaly basqosýǵa elimizdiń batystaǵy tórt oblysynan (Batys Qazaqstan, Atyraý, Aqtóbe, Mańǵystaý) 120-ǵa jýyq belsendi jas qatysty. Basty maqsat - Elbasymyzdyń «Bolashaqqa baǵdar: rýhanı jańǵyrý» maqalasynda kórsetilgen jumystarǵa jastardy tartý, qatystyrý boldy», - dedi ol.