BQO-da jantúrshigerlik jol apatynan qaza tapqan 6 adam - bir otbasynyń músheleri
QazAqparat budan buryn jazǵandaı, 17 qyrkúıek kúni shamamen saǵat 19.30-da Terekti aýdany aýmaǵynda «Lada Priora» DAF júk kóligimen soqtyǵysyp, saldarynan 6 adam qaza tapqan bolatyn.
BQO polıtsııa departamenti bastyǵynyń birinshi orynbasary, polıtsııa polkovnıgi Janbolat Janshınniń málim etkenindeı, qaıǵyly oqıǵadan kóz jumǵandar – erli-zaıyptylar men olardyń tórt balasy.
Onyń sózine qaraǵanda, oqıǵaǵa júrgizýshiniń jol erejesin saqtamaýy sebep bolǵan. Atap aıtqanda, «Lada Priora» jeńil kóligi qarsy betke shyǵyp ketken.
«Anyqtalǵandaı, jeńil kóliktiń tejegishin basqan izi qalmaǵan. Bul jerde júrgizýshi uıyqtap ketken, álde sóılesip, bir nársege alańdaǵan ba, áıteýir baıqamaı, júk kóligimen túıisken. Budan eki jyl buryn Oral qalasynda Zachagan kentinde aınalma jolda eki avtokólik soqtyǵysyp, 8 adam kóz jumǵan edi. Onda da bir otbasy músheleri qaıtqan bolatyn. Jol erejesin saqtaý kerektigin júrgizýshilerdiń esine salamyz. Olar avtokóliktegi jolaýshylardyń ómiri úshin de jaýapty ekendigin umytpaýy kerek. Orny tolmas qaıǵyly oqıǵaǵa baılanysty marqumdardyń týma-týystaryna kóńil aıtamyz», dedi J.Janshın.
BQO polıtsııa departamentinen túsken málimetke qaraǵanda, jyl basynan beri oblysta 270 jol-kólik oqıǵasy (ótken jyly osy merzimde – 213) bolyp, sonyń saldarynan 59 adam (68) mert bolyp, 344-i (262) túrli jaraqat alǵan.