BQO-da Jańaqala sý qubyry qurylysyna 2,5 mlrd astam teńge bólindi

ORAL. QazAqparat - Bıyl Jańaqala toptyq sý qubyryn tartýǵa 2 mlrd 533 mln teńge bólinip, qazir qurylys jumystary júrgizilýde. Bul týraly búgin óńirlik kommýnıkatsııalar qyzmeti alańynda Jańaqala aýdanynyń ákimi Naýryzbaı Qaraǵoıshın málim etti, dep habarlaıdy «QazAqparat» tilshisi.

Onyń aıtýynsha, aýdan boıynsha kúni búgin ortalyqtandyrylǵan aýyz sýmen turǵyndardyń 42,5 paıyzy (10332 adam) qamtylǵan. Al toptyq sý qubyry iske qosylǵan kezde bul kórsetkish 79,1 paıyzǵa (19210 adam) jetpek. Bıyl «Aqbulaq» baǵdarlamasy aıasynda Pıatımar, Birlik, Másteksaı, Muqyr aýyldaryna sý qubyry tartylýda (jobanyń jalpy quny - 1245,0 mln teńge, bólingeni - 1119,5 mln teńge).

Sonymen qatar Jýalyoı, Muqyr, Sarykól, Jangeldi eldi mekenderin tabıǵı gazben qamtý úshin jobalyq quny 184,0 mln teńge turatyn gaz qubyryn tartý jumystary júrgizilýde. Atalǵan tórt aýyl tabıǵı gazǵa qosylǵanda, bul kórsetkish 93,9 paıyzǵa (22820 adam) jetpek, qazir - 87,1 paıyz (20162 adam).

Sol sekildi Chapaev-Jańaqala-Saıqyn avtokólik jolynyń 52 shaqyrymyn jóndeýge 2 mlrd teńge bólinip, tıisti jumystar atqaryldy. Munyń syrtynda Jańaqala aýylyndaǵy kóshe joldarynyń 5,7 shaqyrymyn ortasha jóndeýge 174,342 mln teńge qaralyp, jumystar júrgizilýde.

Aıta keteıik, bıylǵy 1 qazandaǵy málimet boıynsha aýdan bıýdjetine 3 mlrd 383 mln 510,1 myń teńge salyqtar men túsimder, 2 mlrd 761 mln 515,0 myń teńge kóleminde sýbventsııalar men transfertter túsken. Aýdandyq bıýdjettiń toǵyz aıdaǵy kirister jospary 105 paıyzǵa oryndalyp otyr.