BQO-da jańa mektep ǵımaraty iske qosyldy

ORAL. QazAqparat - Búgin Zelenov aýdany Peremetnyı aýyldyq okrýgine qarasty Ozernyı aýylynda jańa mektep ǵımaraty paıdalanýǵa berildi, dep habarlaıdy QazAqparat tilshisi.

Onyń saltanatty ashylý rásimine QR Bilim jáne ǵylym mınıstrligi balalar quqyǵyn qorǵaý komıteti tóraǵasynyń orynbasary Mánshúk Ábdikárim qatysyp, ustazdar men mektep oqýshylaryn, ata-analardy Táýelsizdik merekesimen tuspa-tus kelgen osynaý qýanyshymen quttyqtady.

«Elbasymyz jas urpaqqa bilim berý men óskeleń zaman talaptaryna saı tárbıeleýdi únemi nazarda ustap keledi. Elimiz táýelsizdik alǵannan bergi kezeńde jańa bilim oshaqtary kóptep salynýda. Sonyń biri - Ozernyı aýylyndaǵy mektep», dedi aýdan ákimi Kárim Jaqypov.

 

Ozernyı aýylyndaǵy 48 oryndyq Kırov jalpy bilim beretin negizgi mektep ǵımaratynyń qurylysy bıyl jazda qolǵa alynǵan bolatyn. Ony óńirge tanymal «Otdelstroı» qurylys-kommertsııalyq fırmasy» JShS qysqa merzimde sapaly salyp bitirdi. Seriktestik dırektory Valentına Mıhnov bilim ordasynyń beınelik kiltin mektep dırektory Gúlnaz Qalıevaǵa tapsyrdy.

 

Qazirgi kezde ishi-syrty birdeı jarqyraǵan, ystyq, salqyn sýmen, barlyq kerek-jaraqtarmen qamtylǵan mektepte 44 oqýshy bilim alsa, olarǵa 17 muǵalim ustazdyq etýde. Sondaı-aq «Balbóbek» shaǵyn ortalyǵynda 14 baldyrǵan tárbıelenýde.

Aýdanda osy Kırov mektebiniń qurylysyna bıyl 217 mln. teńge bólinse, aýdan ortalyǵyndaǵy Peremetnyı orta mektebin kúrdeli jóndeýge 162 mln. teńge, taǵy 8 bilim oshaǵyn aǵymdaǵy jóndeýge 74 mln. teńge jumsaldy.

Aıta keteıik, Oral qalasynda salyna bastaǵan qos birdeı bilim ordasyna jáne aldaǵy jyly óńirde qurylysy bastalatyn taǵy eki mektepke 4,3 mlrd. teńge qaralyp otyr.