BQO-da TJ alynǵanymen, blokpostar jumysyn jalǵastyrýda
BQO polıtsııa departamentiniń baspasóz qyzmeti málim etkenindeı, Memleket basshysynyń Jarlyǵyna sáıkes óńirde búgin saǵat 07.00-den bastap tótenshe jaǵdaıdyń kúshi joıylǵan bolatyn.
Oblysta barlyq shaǵyn jáne orta bıznes nysandarynyń, saýda ortalyqtary men bazarlardyń jumysy jandanyp, bank fılıaldary ashyldy. Áýe qatynasy da qalpyna keltirildi.
Degenmen óńirde blokpostar jumysy saqtalyp otyr.
Mundaı sheshim ekstremıstik jáne terrorıstik is-qımyldy uıymdastyrýshylardy anyqtaý jáne ustaý maqsatynda qabyldandy.
Barlyq shekteý sharalary, komendanttyq ýaqyt alynyp tastaldy. Zańdy jáne jeke tulǵalardan ýaqytsha alynǵan qarýlar qaıtarylýda.
Departamentten túsken málimetke qaraǵanda, TJ ýaqytynda 903 adam polıtsııaǵa jetkizildi. Sonyń 91-ine qatysty QR Ákimshilik quqyqbuzýshylyq kodeksi 476-babyna (tótenshe
jaǵdaı rejımin buzý) sáıkes is qozǵaldy. 10 adam ákimshilik qamaqqa alynyp, 62-sine eskertý berildi. 19 materıal sotta qaralýda.
QR Ákimshilik quqyqbuzýshylyq kodeksi 488-babyna (Qazaqstan Respýblıkasynyń beıbit jınalystardy uıymdastyrý jáne ótkizý tártibi týraly zańnamasyn buzý) sáıkes 6 adam jaýapqa tartyldy.
Eske sala keteıik, budan buryn Oralda tótenshe jaǵdaı talabyn buzǵan turǵyndar ustalǵanyn jazǵan bolatynbyz.
Sondaı-aq Batys Qazaqstan jáne Pavlodar oblystarynda tótenshe jaǵdaı alynyp tastaldy.