BQO-da turǵyndardyń 87,2 paıyzy jalpyulttyq halyq sanaǵyna qatysty
Oblys ákiminiń orynbasary Baqytjan Narymbetovtiń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde 46,5 paıyzy onlaın, 40,7 paıyzy oflaın sıpatta sanaqtan ótti.
Onyń sózine qaraǵanda, onlaın saýalnamany uzartý týraly sheshim qabyldanǵan. Soǵan baılanysty sanaq saýaldaryna arnaıy sanaq.gov.kz saıty, e-Gov portaly arqyly tirkelip nemese Aitu mobıldi qosymshasy arqyly jaýap berýge bolady. Onlaın ótý múmkindigi 8 qarashaǵa deıin qoljetimdi bolady.
«Oblys boıynsha 700 ıntervıýer tartyldy. Sanaqtyń bitýine kóp kún qalǵan joq. Alaıda sanaq qyzmetkerleri jumys barysynda qıyndyqqa tap bolýda. Keı turǵyndar tipti esik ashpaıdy, onlaın sanaqtan ótkendigi jóninde habar bermeıdi. On jylda bir ret ótetin halyq sanaǵynyń mańyzdylyǵyn árbir turǵyn túsingeni jón. Bul demografııalyq jáne áleýmettik-ekonomıkalyq baǵytta keń aýqymdy aqparat alýǵa múmkindik beredi», - dedi B.Narymbetov.
QR Strategııalyq josparlaý jáne reformalar agenttigi Ulttyq statıstıka bıýrosy BQO boıynsha departamentiniń basshysy Boltaı Álimbaevanyń aıtýynsha, sanaq ótkizýde Tasqala aýdany kósh bastady.
Munda sanaqqa qatysýshylar sany 100,6 paıyzdy qurady. Qolda bar derekterge sáıkes Tasqala aýdanynda 16 629 adam bolsa, sanaqqa 16 727 adam qatysty.
«Halyq sanaǵyn Jańaqala, Tasqala, Shyńǵyrlaý aýdandary merziminen buryn aıaqtady. Qaratóbe, Syrym aýdandary márege jaqyn qaldy. Qalǵan aýdandarda halyqtyń 80-nen 97 paıyzǵa deıini qamtyldy. Kún saıyn turǵyndardyń 3-4 paıyzy sanaqtan ótedi dep eseptesek, naýqandy ýaqytynda bitirýge múmkindik bar», - dedi B.Álimbaeva.