BQO-da turǵyndar qarjy pıramıdasyna 700 mln teńge salǵan

<p>ORAL. KAZINFORM — Batys Qazaqstan oblysynda qarjy pıramıdasyn uıymdastyrý boıynsha tirkeletin qylmystyq ister sany artyp otyr.</p>

BQO boıynsha ekonomıkalyq tergep-tekserý departamenti basshysynyń orynbasary Nurbol Ahmetovtiń óńirlik kommýnıkatsııalar qyzmeti alańynda ótken brıfıngte málim etkenindeı, óńirde qarjy pıramıdasyna qarajat salyp, tabys tabamyn dep opyq jep qalǵan azamattar sany azaıar emes. 

Nurbol Joldasulynyń sózine qaraǵanda, sońǵy úsh jylda QR QK 217-baby boıynsha qarjy pıramıdasyn quryp, oǵan basshylyq etýdiń 14 deregi tirkelgen. Osy pıramıdalarǵa 3 myńnan astam salymshy qatysqan. 

«Mysaly, bıyl jańa ınvestorlardan tartylǵan qarajat esebinen joǵary aqy tólenetin tabysqa sáıkes qyzmet kórsetemin degen jeleýmen „World Money“ ózara kómek qory» atty qarjy pıramıdasyn quryp, onyń qyzmetin basqarǵan B.Abdýǵalıevke qatysty qylmystyq is máresine jetti. Sotqa deıingi tergep-tekserý barysynda osy qarjy pıramıdasyna 99 salymshynyń 13 mln 575,2 myń teńge kóleminde qarajat salyp, sonyń ishinde 30 azamatqa 2 mln 601,3 teńge múliktik zalal keltirilgeni anyqtaldy. Abdýǵalıev sot úkimimen kináli dep tanylyp, oǵan 3 jyl 6 aıǵa bas bostandyǵyn shekteý jazasy kesildi. Sondaı-aq qarjylyq jáne kommertsııalyq uıymdarda basshylyq laýazymdardy atqarý quqyǵynan aıyryldy», deıdi N.Ahmetov. 

Onyń aıtýynsha, jýyrda «Life is Good» qarjy pıramıdasyna qatysty qylmystyq is boıynsha sottyń aıyptaý úkimi shyqty.

Osy istiń aıasynda qylmystyq jolmen, ıaǵnı atalǵan pıramıdadan alynǵan aqshany zańdastyrý boıynsha epızod anyqtalyp, sot úkimi boıynsha qylmyskerge qosymsha aıyp taǵyldy.

Budan bólek, «Chia Tai Pharmaceutical» qarjy pıramıdasynyń qurylymdyq bólimshelerin uıymdastyrý deregi boıynsha 2 qylmystyq iske núkte qoıyldy. Salymshylardyń qarjysy sheteldegi farmatsevtıkalyq jáne energııa kózin óndirý kompanııalaryna ınvestıtsııa esebinde tartylǵan. 

«Oblysta tabysy az, bilim, densaýlyq saqtaý salasynda jumys isteıtinder, zeınetkerler, basqa da halyqtyń áleýmettik az qamtylǵan tobyna jatatyndar atalǵan pıramıdanyń qurbanyna aınalyp otyr. Salymshylardyń jalpy sany 600-den asady. Olar 700 mln astam teńge salǵan. Al „Qnet“ jáne „Granat“ qarjy pıramıdalary boıynsha qylmystyq is aıaqtalǵan. Bularda jábirlenýshilerge keltirilgen zalal ótelgen. Qarjy pıramıdalaryna qarsy turý baǵytynda is-sharalar júrgizilip keledi. Aıtalyq, 286 saıt, WhatsApp messendjerinde 2 097 qatysýshysy bar 6 top buǵattaldy. 15 kolledjde qarjylyq saýattylyqty arttyrý maqsatynda dárister oqyldy», deıdi N.Ahmetov.

Eske sala keteıik, budan buryn Oralda 23 mln teńgeni qolma-qol aqshaǵa aınaldyrǵan dropperdiń sottalǵanyn jazǵan bolatynbyz.