BQO-da tótenshe jaǵdaı jarııalanǵan eki aýdanǵa shóp qalaı jetkiziledi
BQO aýyl sharýashylyǵy basqarmasynyń basshysy Jasulan Halıýllınniń Kazinform tilshisine málim etkenindeı, qosymsha mal azyǵy retinde 11 myń tonna súrlem, 9 myń tonna pishendeme kerek. Ótken jyldan qalǵan 148 myń tonna shóp qolda bar.
Jasulan Joldybaıulynyń sózine qaraǵanda, oblys boıynsha osy kezge deıin 2,8 mln gektar shabyndyq shabylyp, qaldyq pishendi qosa eseptegende, 1 mln 116,81 myń tonna shóp daıyndaldy, bul – jalpy qajettiliktiń 55,2 paıyzy. Óńirde ár gektardan ortasha eseppen 3,4 tsentnerden ónim alynýda.
«Bıylǵy qýańshylyqqa baılanysty Bókeı ordasy jáne Jánibek aýdanynda tótenshe jaǵdaı jarııalanǵany málim. Qazirgi tańda Bókeı ordasynda qystaqqa qajetti 188,1 myń tonnanyń 61,7 myńy ǵana nemese 32,8 paıyzy daıyndalǵan. Jánibekte 153,6 myń tonnanyń 51,4 myń tonnasy nemese 33,5 paıyzy ázir. Atalǵan qos aýdanda sýbsıdııa sharýa qojalyqtaryna analyq mal basyna mal azyǵyn daıyndaý úshin beriledi. Eseptemeler boıynsha Bókeı ordasy men Jánibekte 73,7 myń bas sıyr, 64,7 myń bas saýlyq qoı jáne 30,9 myń bas bıeni qamtý josparlanýda. Qajetti qarajat kólemi – 2 mlrd 132 mln teńge. Tıisti qarjy oblystyq bıýdjettik komıssııasynda maquldanyp, jýyrda ótken máslıhat sessııasynda bekitildi», - deıdi J.Halıýllın.
Basqarma basshysynyń aıtýynsha, budan bólek, jeke qosalqy sharýashylyqtardyń mal azyǵyna qajettiligin tasymaldaý shyǵyndaryn óteý arqyly uıymdastyrý oılastyrylýda. Atalǵan aýdandarǵa jeke qosalqy sharýashylyqtarǵa barlyǵy 41,6 myń tonna mal azyǵyn tasymaldaý qajet. Mal azyǵymen tolyq qamtý úshin 798,8 mln teńge qarajat esepteldi.
Ońtústik aýdandardy mal azyǵymen qamtamasyz etý úshin ár aýdanǵa 10 myń rýlon shóp daıyndaýǵa tapsyrma berilse, kúni búgin sonyń 40,5 myńy ázir. Sol sekildi oblystaǵy orman sharýashylyǵy mekemeleri atalǵan aýdandardyń jeke qosalqy sharýashylyqtaryna jetkiziletin qajetti 1 myń rýlon shóptiń 560 rýlonyn ázirlep úlgerdi.
«Bókeı ordasy jáne Jánibek aýdandarynyń jeke qosalqy sharýashylyqtary óńirimizdiń soltústik jaǵyndaǵy 8 aýdanynda daıyndalǵan shóp qoryn tasymaldaý arqyly qamtylatyn bolady. Mal azyǵyn tasymaldaýshylar memlekettik satyp alý qorytyndysymen anyqtalady. Mal azyǵymen qamtý máselesin arnaıy qurylǵan oblystyq shtab baqylaýda ustap otyr», - deıdi J.Halıýllın.
Batys Qazaqstanda kıik máselesi kúıip turǵany belgili. Ókinishke qaraı, mal azyqtyq jáne shabyndyq, jaıylymdyq jerlerdi kıikten qorǵaýda elektrondyq baqtashynyń tıimdiligi bolmaı otyr. Sondyqtan birqatar sharýalar óz jerlerin temir tormen qorshaýdy qolǵa alǵan edi. Bul tájirıbe anaǵurlym tıimdi ekendigin kórsetti.
«Qorshalǵan jerlerdi sýbsıdııalaý boıynsha Aýyl sharýashylyǵy mınıstrligine usynys berildi. Salalyq mınıstrlik tarapynan ınvestıtsııalyq salymdardy sýbsıdııalaý qaǵıdasyna sáıkes shyǵyndardy 50 paıyzǵa deıin ishinara óteý boıynsha ózgeris engizý sharalary qabyldanýda. Qarjylyq ınstıtýttarmen birge tótenshe jaǵdaı jarııalanǵan aýmaqta ornalasqan aýyl sharýashylyǵy qurylymdaryna nesıe men lızıngtik kelisim-sharttary boıynsha prolongatsııa berý máselesi de qarastyrylyp otyr», - dep túıindedi oıyn BQO aýyl sharýashylyǵy basqarmasynyń basshysy J.Halıýllın.
Taǵy bir másele, atalǵan aýdandarǵa tasymaldanǵan shópti turǵyndarǵa ádil bólip berý de mańyzdy.
«Tótenshe jaǵdaıǵa baılanysty árbir aýyldyq okrýgte komıssııa quryldy. Sol komıssııalar aýyl turǵyndarynyń malyn naqtylap, qansha pishen qajettigin esepteıdi. Áıtpese shópti kóp alyp, artyǵyn qojalyqtarǵa satyp jiberý sııaqtyń jaǵdaıdyń oryn alýy yqtımal. Mine, osynyń bárin aldyn alý baǵytynda komıssııalar jumystanatyn bolady», - dedi Bókeı ordasy aýdanynyń ákimi Nurlybek Daýmov.
Eske sala keteıik, budan buryn qýańshylyqqa baılanysty BQO aýdandarynda tótenshe jaǵdaı jarııalanǵanyn jazǵan bolatynbyz.