BQO-da Táýelsizdik kúnine arnalǵan respýblıkalyq pikirsaıys týrnıri bastaldy
Atalmysh saıystyń saltanatty ashylýyna qatysqan Batys Qazaqstan oblysy qoǵamdyq damý basqarmasynyń basshysy Gúljanar Shókeeva týrnır qatysýshylaryna Batys Qazaqstan oblysynyń ákimi Narıman Tóreǵalıevtiń quttyqtaý hatyn oqyp berdi. Sonymen qatar elimizdiń táýelsizdik jyldarynda jetken jetistikteri men Batys Qazaqstan oblysynyń erekshelikterin tilge tıek etti.
Pikirsaıys týrnıri elimizge belgili, bedeli joǵary oqý oryndarynyń biri M.Ótemisov atyndaǵy Batys Qazaqstan ýnıversıtetinde ótip jatyr. Atalmysh týrnırdiń negizgi maqsaty - Qazaqstan Respýblıkasynyń Táýelsizdigi kúni qarsańynda elimizdiń jetken jetistikterin nasıhattaý jáne memlekettik mańyzy bar máselelerdi talqylaý jáne olardy sheshý baǵytynda tyń ıdeıalardy týdyrýǵa múmkindik jasaý.
Ashylý saltanatynda sóz sóılegen ýnıversıtettiń tárbıe jumysy jáne áleýmettik máseleler jónindegi prorektory, týrnır uıymdastyrýshylarynń biri Mergen Súleımenov joǵarǵy oqý orny týrnıriniń ótetin orny men ózge aımaqtan kelgen qatysýshylardy turatyn orynmen qamtamasyz etýge qoldaý kórsetýge daıyn ekenin jetkizdi.
Pikirsaıys «Brıtandyq parlamenttik format», «Amerıkandyq parlamenttik format», «Lınkoln – Dýglas» formattarynyń erejeleri boıynsha qazaq tilinde ótkiziledi. Eki kúnge sozylatyn Respýblıkalyq pikirsaıys týrnırine Oral qalasynyń pikirsaıysshylarynan bólek Astana, Túskistan, Qostanaı, Aqtaý, Taldyqorǵan, Jetisaı, Atyraý, Aqtóbe qalalarynan kelgen 32 komanda qatysyp jatyr.
Bul is-sharadan bólek pikirsaıysqa qatysýshylar arasynda sporttyq jarystar ótkizý de josparlanyp otyr. Týrnır jeńimpazdary 3 jeltoqsan kúni anyqtalyp, dıplom jáne aqshalaı syılyqtarmen marapattalady.