BQO-da táýelsizdik jyldary densaýlyq saqtaý bıýdjeti 12,5 ese ósti
BQO Densaýlyq saqtaý basqarmasynyń basshysy mindetin atqarýshy Arman Qalıbekov Óńirlik kommýnıkatsııalar qyzmeti alańynda ótken brıfıngide málim etkenindeı, sala bıýdjeti 2005 jyly 6,6 mlrd teńge bolsa, ótken jyly 59,2 mlrd, bıyl 82,6 mlrd teńgege jetti.
Onyń sózine qaraǵanda, densaýlyq saqtaý nysandarynyń materıaldyq-tehnıkalyq bazasyn jaqsartý úshin sońǵy bes jylda 200 sanıtarııalyq avtokólik satyp alyndy, 79 densaýlyq saqtaý nysanyna kúrdeli jóndeý júrgizildi, emdeý oryndary medıtsınalyq jabdyqtarmen 85 paıyzǵa jaraqtandyryldy, 4 myńnan astam túrli medıtsınalyq jabdyq satyp alyndy.
Aýyl turǵyndaryna ýaqtyly jáne sapaly qyzmet kórsetý maqsatynda oblysta 12 jyljymaly medıtsınalyq keshen jumys isteıdi. Jyl saıyn shalǵaıdaǵy eldi mekenderdiń 50 myńǵa jýyq turǵyny qamtylady.
«Táýelsizdik jyldary óńirde 110 densaýlyq saqtaý nysany boı kóterdi. Sonyń ishinde 13 aýrýhana, 5 emhana, 19 dárigerlik ambýlatorııa, 3 feldsherlik-akýsherlik pýnkt, 59 medıtsınalyq pýnkt jáne basqa nysandar bar. Oblystyń densaýlyq saqtaý salasynyń kadrlyq áleýetin arttyrý máselelerine de erekshe kóńil bólinedi. Kúni búgin 1746 dáriger, 6581 orta medıtsınalyq qyzmetker jumys isteıdi», - dedi A.Qalıbekov.