BQO-da tarıhı Han ordasy aýylyna aparatyn jol salynady
«QazAvtoJol» UK» AQ BQO fılıalynyń dırektory Asylbek Mardannyń málim etkenindeı, bıyl atalmysh aýylǵa 21 shaqyrym kireberis joldy ortasha jóndeý bastalady.
Asylbek Amantaıulynyń sózine qaraǵanda, osy jobaǵa 1 mlrd 953 mln teńge qarastyryldy. Merdiger – «Aqjol qurylys» JShS.
Fılıal dırektorynyń aıtýynsha, bıyl oblysta respýblıkalyq mańyzy bar 245 shaqyrym jol kúrdeli jóndeledi.
Sonyń ishinde qurylysy tórt jylǵa sozylǵan uzyndyǵy 142 shaqyrym Kaztalov-Jánibek-RF shekarasy jáne 103 shaqyrym Ónege-Bısen-Saıqyn avtojoly bıyl máresine jetedi.
«2024 jyly 22,6 shaqyrymǵa asfaltbeton jabynynyń tómengi qabatyn jáne 168,3 shaqyrymǵa joǵary qabatyn salý josparlanǵan. Bıyl 170 myń tonnadan astam qıyrshyq tas jáne 4,5 myń tonna bıtým ónimderi daıyndaldy. Qıyrshyq tas Aqtóbe oblysy men Reseıden temirjol arqyly jetkiziledi. Qurylys jumystary Kaztalov-Jánibek jáne Ónege-Bısen-Saıqyn tas jolyndaǵy 6 ýchaskede júrgiziledi. Jumysty 5 qurylys kompanııasy júrgizedi. Jol jóndeýmen qatar demalys alańdary, sanıtarlyq-gıgıenalyq toraptar, avtobýs aıaldamalary salynyp, jol belgileri ornatylady. Jyl sońyna deıin barlyq jumysty aıaqtap, joldy paıdalanýǵa berý kózdelip otyr», - dedi A.Mardan.
Han ordasy aýylynyń irgesin 1826 jyly Jáńgir han qalaǵany belgili.
Onda Batys Qazaqstan oblystyq Han Ordasy tarıhı-mádenı, arhıtektýralyq-etnografııalyq mýzeı-qoryǵy ornalasqan.
Han ordasyna aparatyn kireberis jol salynyp, Ónege-Bısen-Saıqyn jolyna qosylǵan kezde týrızmge de qolaıly jaǵdaı jasalady.
Eske sala keteıik, budan buryn Batys Qazaqstanda 560 shaqyrymnan astam avtokólik jolyn jóndeý kózdelip otyrǵanyn jazǵan bolatynbyz.