BQO-da taǵy 2 jasóspirim sýǵa batyp ketti
BQO Tótenshe jaǵdaılar departamentiniń baspasóz qyzmetinen málim etkenindeı, qaıǵyly oqıǵalardyń biri 6 tamyz kúni Bórli aýdany, Baqtyaral aýylynda boldy.
Saǵat 17.00 shamasynda jergilikti turǵyndar 12 jasar qyzdyń denesin Shyńǵyrlaý ózeninen shyǵaryp aldy. Ol saǵat 15.40-ta shomylýǵa jabdyqtalmaǵan jerde sýǵa batqan.
Sondaı-aq keshe saǵat 18.15 shamasynda Oral qalasynda 17 jastaǵy ul Jaıyq ózenine batyp ketti. 45 mınýttan keıin denesin qutqarýshylar alyp shyqty.
Eske salaıyq, budan bir kún buryn – 5 tamyzda Báıterek aýdany, Jaıyq-2 eldi mekeni mańyndaǵy «Miami park» demalys aımaǵynda 16 jastaǵy jasóspirim sýdan kóz jumdy.
Departament málimetine qaraǵanda, demalys kúnderi óńirde 4 adam qaza bolsa, sonyń úsheýi – jasóspirimder.
Shomylý maýsymy bastalǵannan beri barlyǵy 11 adam ajal qushty. Sonyń ishinde Oralda – 5, Báıterek aýdanynda – 3, Aqjaıyqta 2 adam sýǵa ketti. Barlyq jazataıym oqıǵalar shomylýǵa jabdyqtalmaǵan jerlerde boldy.
Jyl basynan BQO TJ departamentiniń kúshimen 10 adam qutqarylsa, sonyń jeteýi – balalar.
BQO TJ departamenti oblys turǵyndary men qonaqtaryna sýdaǵy qaýipsizdik erejelerin qatań saqtaý kerektigin eske salady.
«Oblysta barlyǵy 26 jaǵajaı bolsa, sonyń 23-i jumys istep tur. Sý aıdyndarynyń qaýipti, shomylý úshin jabdyqtalmaǵan ýchaskelerinde 323 tyıym salý belgisi men 77 aqparattyq stend ornatylǵan. Sý aıdyndarynda qaýipsizdik qaǵıdalaryn buzǵany úshin jeke tulǵalarǵa 12 ákimshilik hattama toltyryldy. Sý aıdyndaryndaǵy qaýipsizdik qaǵıdalaryn buzý nemese oryndamaý QR Ákimshilik quqyqbuzýshylyq kodeksiniń 412-babyna sáıkes jaýaptylyqqa ákep soǵady. Jeke tulǵalarǵa 7 AEK (24 150 teńge), zańdy tulǵalarǵa 10 AEK (34 500 teńge) kóleminde aıyppul salynady», dep habarlady vedomstvodan.