BQO-da suıytylǵan gazdyń jetispeýshiligi baıqalýda

ORAL. QazAqparat – Batys Qazaqstan oblysynda avtogaz quıý stansalarynda suıytylǵan gazdyń jetispeýshiligi baıqalady, dep habarlaıdy QazAqparat tilshisi.

Birqatar usaq stansalarda suıytylǵan gaz joq bolsa, birqatarynda kezek qalyptasty, keıbireýinde tek talon arqyly berilýde.

BQO energetıka jáne turǵyn úı-kommýnaldyq sharýashylyq basqarmasynyń basshysy Mırjan Nurtazıevtiń aıtýynsha, 14 qarashadaǵy málimet boıynsha óńirdegi gaz toltyrý stansalarynda 180 tonna suıytylǵan gaz qaldy.

«Bekitilgen josparǵa sáıkes oblystyń ishki naryǵyna qarasha aıynda 3438 tonna suıytylǵan munaı gaz jóneltilýi tıis edi. Alaıda 26 qazanda «ANPZ» JShS (Atyraý munaı óńdeý zaýyty) qarasha aıynda gaz óndirý kólemi azaıatyny jóninde habardar etken. Soǵan baılanysty sońǵy satyp alýshylarǵa (avtogaz quıý stansalary, gaz toltyrý stansalary) gaz jetkizý kólemi 35 paıyzǵa tómendetiledi», dedi M.Nurtazıev.

Onyń sózine qaraǵanda, «ANPZ» JShS 8 qarashada tehnologııalyq qondyrǵylarǵa 7-14 qarasha aralyǵynda aǵymdaǵy jóndeý júrgiziletini jóninde habarlaǵan. Aldyn ala málimet boıynsha zaýyt 18 qarasha kúni tolyq qýatymen jumys jasap, BQO-daǵy tutynýshylarǵa gazdy jónelte bastaıdy.

Ónim bólisý jónindegi kelisimge sáıkes oblystyń ishki naryǵyna suıytylǵan gazdy jetkizý boıynsha «Jaıyqmunaı» JShS-nyń qandaı ma bolmasyn mindettemesi joq. Degenmen «Jaıyqmunaı» JShS-men oblystyń gaz toltyrý stansalaryna suıytylǵan gaz jóneltý jóninde kelisim bar. Bul kólem usaq avtogaz quıý stansalary arqyly satylady.

«Sondaı-aq Energetıka mınıstrligi «SNPS-Aqtóbemunaıgaz» AQ-dan qosymsha 504 tonna gaz bóldi. Bul gaz kólemin temir jol arqyly jetkizip, bólý baǵytynda tıisti jumystar atqarylatyn bolady», dedi M.Nurtazıev.