BQO-da sýǵa ketken egistik, baý-baqsha alqaptarynyń shyǵyny anyqtalyp jatyr
BQO aýyl sharýashylyǵy basqarmasy basshysynyń mindetin atqarýshy Rústem Zulqashevtiń óńirlik kommýnıkatsııalar qyzmeti alańynda ótken brıfıngte málim etkenindeı, aýdan men qala ákimdikteriniń málimetine sáıkes sý tasqyny saldarynan 4 955 gektar dándi daqyldar, 5,1 ga baý-baqsha, 2,1 ga jylyjaı jáne qulpynaı egisine zaqym keldi.
Onyń sózine qaraǵanda, 17 mamyrda ósimdik sharýashylyǵy salasynda sý tasqyny saldarynan keltirilgen zalaldy óteý qaǵıdalary bekitildi.
«Qazirgi tańda aýdandarda qaǵıdaǵa sáıkes komıssııalar qurylyp, jumys jasap jatyr. Kúni búginge deıin 24 ótinim tústi. Zardap shekken ár nysan boıynsha tehnologııalyq kartalar jasalyp, ǵylymı-zertteý ınstıtýtymen kelisiledi. Sodan keıin komıssııalar shyǵyndy eseptep, tıisti qorytyndy shyǵarady», - dedi R.Zulqashev.
Basqarma basshysynyń aıtýynsha, mal shyǵyndary tolyqtaı óteldi. Atap aıtqanda, 139 ótinimge sáıkes aýyl sharýashylyǵy janýarlarynyń birdeılendirý júıesinde tirkelgen 1 171 bas (219 iri qara, 680 qoı-eshki, 63 jylqy, 71 shoshqa, 138 úı qusy) mal úshin 151,6 mln teńge tólendi.
«Al aýyl sharýashylyǵy janýarlarynyń birdeılendirý júıesinde tirkelmegen mal bastaryna shyǵyndy óteý bıýdjettik emes kózderden júrgizildi. Oblys boıynsha barlyǵy 2 457 bas mal shyǵyny rastalsa, sonyń ishinde atalǵan júıede tirkelgen 1 171 bas boıynsha eshqandaı áńgime bolǵan joq. Al esepte joq 1 286 bas mal shyǵynynyń ornyn toltyrýǵa jergilikti sharýashylyqtar men turǵyndar kómektesti. Bul rette Kaztalov jáne Jánibek aýdany turǵyndarynyń belsendi jumysyn atap kórsetýge bolady», - dedi Kazinform tilshisine R.Zulqashev.
Eske sala keteıik, budan buryn BQO-da shyǵynǵa ushyraǵan 1 200-ge jýyq mal basy úshin ótemaqy tolyqtaı tólengenin jazǵan bolatynbyz.
Sondaı-aq Batys Qazaqstanda biregeı alma baǵy joıylyp ketýi múmkin.