BQO-da sý tasqynynan zardap shekken turǵyndarǵa taǵy 65 páter berildi

<p>ASTANA. KAZINFORM - Memleket basshysy sý tasqynynan zardap shekken turǵyndarǵa tıisti kómek kórsetýdi tapsyrǵan bolatyn. Osy rette, sý tasqyny saldarynan baspanasy jaramsyz dep tanylǵan Oral qalasyndaǵy saıajaı turǵyndaryna taǵy 65 páter berildi.</p>

Jańa páterler demeýshi tarapynan, atap aıtqanda Nurlan Smaǵulov Qorynyń qarjysyna satyp alyndy. 

Úkimet basshysynyń tapsyrmasyna sáıkes, qarjylyq uıymdar men demeýshiler óńirlerde sý tasqynynan zardap shekken turǵyndarǵa qol ushyn sozýda. 

Turǵyn úılerdiń kiltterin tabystaý rásimine Batys Qazaqstan oblysynyń ákimi Narıman Tóreǵalıev qatysyp, qonys ıelerin quttyqtady. 

«Memleket basshysynyń tapsyrmasy aıasynda sý tasqynynan zardap shekken turǵyndarǵa qoldaý kórsetip jatyrmyz. Búgingi kúnge deıin Oraldaǵy 1103 saıajaı turǵyny jańa páterlerin resmı túrde rásimdedi. Dál qazir sý tasqynynan zardap shekken taǵy 65 saıajaı turǵynyna jańa páterdiń kiltterin tabys etpekpiz.

Sonymen qatar oblysymyzda sý tasqynynan zardap shekken azamattarǵa 775 turǵyn úıdiń qurylysy júrip jatyr. Turǵyn úılerdiń sapasy jáne ýaqytyly aıaqtalýy qatań baqylaýda», - dedi oblys ákimi Narıman Tóreǵalıev. 

Oral turǵyny Mazdaq Sarsenǵalıevanyń kóktemgi sý tasqyny kezinde qaladaǵy 1-shi saıajaı ýchaskesindegi jalǵyz baspanasy sýǵa ketken. 3 aı ýaqyttan soń, ol búgin jańa baspanasyna kirip, qýanyshymen bólisti. 

«Memlekettiń qoldaýynyń arqasynda barlyq qıyndyqtar artta qaldy. Prezıdentimiz Qasym-Jomart Kemelulyna alǵysymyzdy bildiremiz. Dalada qalmadyq. Aldaǵy ýaqytta tek jaqsylyqtar bola bersin», - dedi ol.