BQO-da sý tasqynynan zardap shekken turǵyndarǵa baspana berilip jatyr
Báıterek aýdanynda 2, Terektide 5 otbasy jańa qonysqa kóshti. Báıterek aýdany Dostyq aýylynyń turǵyny Aqmaral Slamǵalıqyzynyń baspanasy sý tasqyny saldarynan jaramsyz bolyp qalǵan. Búginde Aqmaral Slamǵalıqyzy jańa úıine qonystandy.
«Úsh bólmeli úıim sýǵa ketken edi. Qorqynyshty ýaqytty bastan keshirdik. Alaıda Prezıdenttiń «Dalada qalmaısyzdar» degen sózi bizge úlken úmit berdi. Alǵysymyz sheksiz. Mine, búgin baspanaly bolyp otyrmyz», - dedi ol.
Sonymen qatar Oral qalasyna irgeles ornalasqan Terekti aýdanyna qarasty Podstepnyı aýylynyń turǵyndary da baspanaǵa qol jetkize bastady.
Júrgizilgen tehnıkalyq zertteý nátıjesinde Podstepnyı aýyly boıynsha 116 turǵyn úı jaramsyz dep tanylǵan. Qazirgi tańda 106 úıdiń qurylysy bastalsa, 10 turǵyn úı satyp alynyp jatyr. Baspanasy sýda qalǵan jandardyń biri – Aıgúl Keńesova. Ol alǵashqylardyń biri bolyp, jańa páteriniń kiltin aldy.
«Men osy aýyldyń turǵynymyn. Sý tasqyny kezinde jalǵyz úıim sýǵa ketti. Bul másele kúzge deıin sozylyp kete me degen qorqynysh bolǵan edi. Alaıda ákimdik az ǵana ýaqytta bizge páter satyp áperýge yqpal etti. Osylaısha, búgin qonys toıyn toılap jatyrmyz. Memleket basshysyna alǵysymdy bildiremin», - dedi Aıgúl Keńesova.
Eske sala keteıik, budan buryn Oralda jalǵyz baspanasy apatty dep tanylǵan saıajaı turǵyndaryna páter berile bastaǵanyn jazǵan bolatynbyz.