BQO-da sý tasqynynan egistikke kelgen zalal 261 mln teńgeden asty
BQO aýyl sharýashylyǵy basqarmasy basshysynyń mindetin atqarýshy Rústem Zulqashevtiń málim etkenindeı, komıssııalardyń qorytyndysyna sáıkes jalpy zalal kólemi 261 mln 566,443 myń teńge boldy.
Sonyń ishinde Sergeı Isaev atyndaǵy halyqaralyq eksperımentaldyq kollektsııalyq tálimbaqta 4,5 gektar aýmaqty sý basý saldarynan 104,4 mln astam teńge zalal keltirilgen.
Budan basqa kúzdik bıdaı, jemis-jıdek, qulpynaı, tańqýraı, sarymsaq, qııar egilgen alqaptarǵa kelgen zııan da esepteldi.
«Osylaısha, tótenshe jaǵdaıǵa baılanysty ósimdik sharýashylyǵyna kelgen shyǵyn kólemi eseptelip, oblystyq qarjy basqarmasyna tapsyryldy. Qarjy jergilikti bıýdjetten tólenedi», dedi R.Zulqashev.
Sergeı Isaev atyndaǵy tálimbaqtyń ıesi, belgili baǵban Qaırat Kárimovtiń aıtýynsha, keltirilgen shyǵyn qatardaǵy baq retinde eseptelgen.
«Qazaqstandaǵy biregeı baq bolǵandyqtan, shyǵyndy eseptegen kezde onyń tektik (genetıkalyq) ereksheligin eskerse dep edim. Degenmen osy qarjyǵa jumystanamyz. Qazaqstan men Reseıdiń belgili ǵalymdary bizdiń tálimbaqty saqtap qalý jóninde Prezıdent pen Premer-Mınıstrdiń atyna hat jazdy. Onyń da nátıjesin kútemiz», dedi Q.Kárimov.
Eske sala keteıik, budan buryn BQO-da sýǵa ketken egistik, baý-baqsha alqaptarynyń shyǵyny anyqtalyp jatqanyn jazǵan edik.
Sondaı-aq Batys Qazaqstanda biregeı alma baǵy joıylyp ketýi múmkin.
BQO-dda sý tasqyny saldarynan 6 myńǵa jýyq úıge zalal kelgen.