BQO-da sý basqan aýmaqtarda synamalar alynyp, dezınfektsııalaý jumystary júrgizilip jatyr
BQO sanıtarııalyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde mıkrobıologııalyq zertteýge 749 synama alynyp, odan 33 sáıkessizdik (4,4 paıyzy) anyqtaldy.
Muhamǵalı Qaıyrjanulynyń sózine qaraǵanda, sonymen qatar sanıtarlyq-hımııalyq zertteýge alynǵan 740 synamanyń 41-inen (5,5 paıyzy) sáıkessizdik anyqtalyp otyr. Munyń basym bóligi sýdyń kermektiligi men laılylyǵy boıynsha sáıkes kelmedi.
«Sýdyń sáıkes kelmeıtin synamalary boıynsha sý sharýashylyǵy uıymdary sýmen jabdyqtaý júıelerin jýý jáne dezınfektsııalaý is-sharalaryn júrgizedi. Sodan keıin aýyz sýdyń baqylaý synamasy alynyp, tekseriledi. Sýdyń sapasy men qaýipsizdiginiń zerthanalyq monıtorınginiń nátıjeleri boıynsha juqpaly aýrýlardyń sý arqyly paıda bolý qaýpi joq», - dedi departament basshysy.
M.Aryspaevtyń aıtýynsha, sý basqan aýmaqta halyqtyń patogendik mıkroorganızmderdi juqtyrý jáne ınfektsııalyq, onyń ishinde asa qaýipti aýrýlardyń taralý qaýpi artady.
Sondyqtan oblystyń tórt aýdanynda osy kóktemde sý basqan úıler men nysandardy dezınfektsııalaý jumystary júrgizilýde. Mysaly, Syrym aýdany Óleńti aýylynda ornalasqan sibir jarasynan ólgen 3 mal kómindisi, Jympıty, Óleńti, Buldyrtyǵa qosa Qaratóbeniń Qorjynynda 4 mal qorymy, ákimdik pen mektep ǵımaraty, turǵyn úıler, aýla aýmaqtary men dárethanalar dezınfektsııalandy.
Sondaı-aq Syrym aýdany Qosaral aýylynda sý qubyry, aýla aýmaqtary bar 124 turǵyn úı, septık pen dárethanalar, Terektide Kemer aýylynyń uńǵymasy, Podstepnyı, Uzynkól, Shóptikól, Tóńkeris mektepteri, Podstepnyıda 52 turǵyn úı, onyń septıkteri men dárethanalary, Bórlide Aqsý eldi mekeniniń medıtsınalyq pýnkti men turǵyn úılerinde osyndaı jumystar atqarylyp jatyr.
«Oblys boıynsha barlyǵy 14 sýmen jabdyqtaý júıesi sýǵa ketse, sonyń 9-y – jer astynda ornalasqan uńǵymalar. Qazirgi tańda osy oryndardyń bári dezınfektsııalanyp, qatań baqylanýda. Taǵy bir aıtarymyz, óńirde 10 evakýatsııalyq pýnktte 2 325 adam jatsa, sonyń 1 006-sy – balalar. Atalmysh pýnktterde departamentke qarasty aýmaqtyq basqarmalar mamandary kezekshilik atqarýda. Kezekshilik kezinde sý basý oryndarynan evakýatsııalanǵan halyqty tamaqtandyrý jáne olardyń ýaqytsha meken-jaıyn taza ustaýǵa erekshe nazar aýdarylady. Osy maqsatta dezınfektsııalaý jáne jeldetý jumystaryna baqylaý ornatylǵan. Turǵyndardyń sý tasqyny kezeńinde qarapaıym jáne tıimdi erejelerdi saqtaýy kerektigin eske salamyz», - dedi M.Aryspaev.
Departament málimeti boıynsha A vırýstyq gepatıtiniń aldyn alý maqsatynda ýaqytsha ornalastyrý pýnktterinde buryn josparly ekpelerin ótkizip alǵan 14 jasqa deıingi 28 balaǵa vaktsınatsııa jasalǵan.
Eske sala keteıik, budan buryn Jaıyq ózeniniń deńgeıi Taıpaq aýyly tusynda qaýipti shekten asyp ketkenin jazǵan bolatynbyz.
Batys Qazaqstan oblysynda jańadan sý qoımalary qashan salynady.