BQO-da skarlatınanyń taralýyna jol bermeý úshin shuǵyl sharalar qabyldanyp jatyr

<p>Batys Qazaqstan oblysy Tasqala aýdanynyń bilim nysandarynda skarlatınanyń aldyn alý sharalary kúsheıtildi, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

BQO sanıtarııalyq-epıdemıologııalyq baqylaý departamentiniń baspasóz qyzmetinen málim etkenindeı, óńirde jyl basynan beri 708 adamnyń skarlatınamen aýyrǵany tirkelse, sonyń 653-i – 14 jasqa deıingi bala. Jalpy jaǵdaı baqylaýda.

«Tasqala aýdanynda 11 aı ishinde syrqattanýdyń deńgeıi ótken jylǵy kórsetkishtermen birdeı. Skarlatınaǵa shaldyqqan 10 adamnyń bári de – 14 jasqa deıingiler. Jeltoqsan aıynyń basynan beri 8 jańa jaǵdaı tirkeldi, sonyń altaýy balabaqshada jáne ekeýi mektepte anyqtalyp otyr. Aýrýdyń jańa jaǵdaıyn eskere otyryp, jergilikti atqarýshy organdar skarlatınanyń odan ári taralýyn boldyrmaý úshin shuǵyl sharalar qabyldap jatyr. Bilim berý nysandarynda sanıtarlyq-dezınfektsııalyq rejım kúsheıtildi. Sondaı-aq ahýal nasharlaǵan jaǵdaıda maska rejımin engizý jáne qashyqtan oqytýǵa kóshý múmkindigi máseleleri qarastyrylady. Biz aımaqta skarlatınanyń odan ári taralýyn baqylaý jáne aldyn alý úshin jergilikti organdarmen jáne medıtsınalyq mekemelermen tyǵyz yntymaqtastyqta jumys isteýdemiz», - dep habarlady vedomstvodan.

Tasqala aýdanynyń ákimi Talǵat Shákirovtiń áleýmettik jelide málim etkenindeı, aýdanda skarlatına ınfektsııasynyń taralýyna baılanysty Tasqala aýylyndaǵy «Baldyrǵan» bóbekjaı-balabaqshasynda shekteý sharalary jarııalanǵany belgili.

Onyń sózine qaraǵanda, juqpaly dert Y.Altynsarın atyndaǵy orta mektep oqýshylary arasynda da anyqtalyp otyr. Oǵan qosa tumaý da órship tur. Bóbekjaı karantınge jabylyp, mektepterde betperde rejımi engizildi.

«Áleýmettik jelilerde aýdanda ınfektsııalyq aýrý oshaqtary anyqtalýyna baılanysty ata-analar tarapynan oqý protsesin toqtatý boıynsha usynystar kóp túsip jatyr. Aptalyq lezdemede aýdandyq bilim berý bólimine sanıtarlyq-epıdemıologııalyq qadaǵalaý basqarmasymen birlese otyryp, qashyqtan oqý rejımine kóshý máselesin qarastyrý boıynsha tapsyrma berdim», - dedi T.Shákirov.

Eske sala keteıik, budan buryn BQO balabaqshasynda birden 6 búldirshin skarlatına dertine shaldyǵyp, bireýi qaıtys bolǵanyn jazǵan edik.