BQO-da «Syrym» avtomobıl ótkizý beketi 16 aıǵa jabylýy múmkin

<p>ORAL. KAZINFORM &ndash; Batys Qazaqstan oblysynda Reseımen shekarada ornalasqan &laquo;Syrym&raquo; avtomobıl ótkizý beketin 16 aıǵa jabý josparlanyp otyr.&nbsp;</p>

BQO TJ departamentiniń baspasóz qyzmetinen málim etkenindeı, bul týraly QR Kólik mınıstrligi Avtomobıl kóligi jáne kóliktik baqylaý komıteti tóraǵasy orynbasarynyń 2024 jylǵy 25 jeltoqsandaǵy hatynda jazylǵan.

Atalmysh hatta habarlanǵanyndaı, Qazaqstan Respýblıkasy Premer-mınıstriniń birinshi orynbasary Roman Sklıar 2024 jylǵy 28 maýsymda bekitken 2024-2030 jyldarǵa arnalǵan «Jol kartasy» aıasynda ótkizý pýnktterin qaıta jańǵyrtý boıynsha aýqymdy jumys júrgizilýde. Osyǵan sáıkes Aqtóbe jáne Batys Qazaqstan oblysynda ornalasqan «Álimbet» jáne «Syrym» ótkizý beketterin 2025 jylǵy 1 aqpannan 16 aı merzimge ýaqytsha jabý kózdelip otyr. 

QR UQK Shekara qyzmeti BQO boıynsha departamenti bul jumystyń josparlanyp otyrǵanyn, soǵan qatysty aqparatty «QazAvtoJol» UK» AQ beretinin jetkizdi. 

- Memlekettik shekaradaǵy ótkizý beketin jabý týraly sheshimdi QR Kólik mınıstrligi Avtomobıl joldary komıtetiniń kelisimimen UQK Shekara qyzmeti shyǵarady. Jaqyn arada bul máseleni ýákiletti organdarmen birlesip talqylaý oılastyrylýda, - dep habarlady Kazinform tilshisine «QazAvtoJol» UK» AQ BQO fılıalynan.

Óz kezeginde Oral qalasynyń turǵyny, júrgizýshi Jarqyn Maǵzomov atalǵan beket jabylsa júrgizýshiler men shekaradan ótetin turǵyndar qınalatynyn aıtty. 

- Keıingi jyldary Batys Qazaqstan men Samara oblystarynyń shekarasynda ornalasqan «Syrym» ótkizý beketinde kólik keptelisi jıi bolyp júrgeni kópshilikke málim. Endi ony osynshama ýaqytqa jabatyn bolsa, bul júrgizýshiler men shekaradan ótetin turǵyndar úshin qıyndyq týǵyzatyny anyq. Sondyqtan muny jan-jaqty oılastyrý qajet, - dedi Oral qalasynyń turǵyny, júrgizýshi Jarqyn Maǵzomov. 

Eske sala keteıik, budan buryn BQO-da Reseımen shekarada júk kólikteriniń keptelisi týyndaǵanyn jazǵan bolatynbyz.