BQO-da shekaradan ótken 31 adamnan koronavırýs anyqtaldy

ORAL. QazAqparat – Batys Qazaqstan oblysynda 1 qazan men 20 jeltoqsan aralyǵynda Reseımen shektesetin «Tasqala», «Syrym», «Jánibek» jáne «Aqsaı» avtoótkelderinen óńirge 59259 adam ótti, dep habarlaıdy QazAqparat.

BQO densaýlyq saqtaý basqarmasynan habarlaǵanyndaı, sonyń ishinde 1896 adamnyń testileýden ótkeni jóninde anyqtamasy bolǵan joq.

Olardyń bári de jeti kúndik karantınge jatqyzylyp, synama alynǵan kezde 31-inen koronavırýs tabyldy.

Óńirde tranzıttik júk tasymaldaıtyn avtokólikterdiń qozǵalysyn retteý baǵytynda oblystyq jolaýshylar kóligi jáne avtomobıl joldary, kásipkerlik jáne ındýstrıaldyq-ınnovatsııalyq damý basqarmalary, BQO polıtsııa departamenti is-qımyl algorıtmin jasaqtady.

Soǵan sáıkes oblystyq jolaýshylar kóligi jáne avtomobıl joldary basqarmasy tranzıttik júk kólikteri aıaldaıtyn marshrýtty (Samara-Shymkent jolynda 5 janar-jaǵar maı quıý stansasy – «QazMunaıGaz», «VenOil», «Moskvıchı», «Neftek» jáne «Gelıos») belgiledi.

Oblystyq kásipkerlik jáne ındýstrıaldyq-ınnovatsııalyq damý basqarmasy jol boıynda ornalasqan nysandarda sanıtarlyq-epıdemıologııalyq talaptardyń saqtalýy kerektigi jóninde túsinik jumystaryn júrgizip keledi.

Oblystyq polıtsııa departamenti júk kólikterin qarsylap alyp, shyǵaryp salady.

Kúni búginge deıin óńirde 8782 adam koronavırýs juqtyrsa, sonyń 7700-i jazylyp shyqty. 154 adam kóz jumdy.

Sońǵy táýlikte 37, bir aptada 259 adamnyń indetpen aýyrǵany tirkeldi.

Qazirgi tańda pnevmonııaǵa shaldyqqan 125 adam statsıonarda, 47-si ambýlatorlyq em alýda. Bul dertten 239 adam qaıtys boldy.

Invazıvti emes jasandy tynys alý apparatyna 3, jasandy tynys alý apparatyna 2, ottegi kontsentratoryna 5, ortalyqtandyrylǵan ottegi kózine 26 adam qosylǵan.

Juqpaly aýrýlar aýrýhanalarynda 150, karantındik statsıonarda 55, jansaqtaý bóliminde 14 adam jatyr.

Eske sala keteıik, budan buryn BQO-da juqpaly aýrýlar aýrýhanalarynda 155 naýqastyń emdelip jatqanyn, 100-ge jýyq nysannyń sanıtarlyq talapty buzǵanyn jazǵan bolatynbyz.