BQO-da Shekara qyzmeti departamentiniń bólim basshysyna aıyppul salyndy

<p>ORAL. KAZINFORM — Oral qalasynda júrgizýshi kýáliginen aıyrylǵanyna qaramastan, kólik aıdap júrgen BQO boıynsha Shekara qyzmeti departamentiniń bólim basshysy ustaldy.</p>

BQO sotynan túsken málimetke qaraǵanda, S. degen azamat 2024 jylǵy 14 mamyrdaǵy qaýlyǵa sáıkes QR Ákimshilik quqyq buzýshylyq týraly kodeksi 608-baby 1-bóligine (júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, sol sııaqty kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarýyna berý) sáıkes kólik quralyn basqarý quqyǵynan aıyrylǵan.

Soǵan qaramastan, departamenttiń bólim basshysy bıylǵy 15 qyrkúıekte avtokólik aıdap júrgende qolǵa túsken.

«Sot otyrysynda S. kólik quralyn basqarý faktisin joqqa shyǵarmaı, jazany aıyppul túrindegi óndirip alýmen shektelýdi surady. Sot talqylaýy onyń atalǵan kodekstiń 612-baby 3-bóligin buzǵanyn kórsetti. Bul elý aılyq eseptik kórsetkish mólsherinde aıyppul salýdy nemese on táýlikke ákimshilik qamaqqa alýdy kózdeıdi. Sot kodekstiń 44-babyn, 829-14-baby 1-bóliginiń 1-tarmaǵyn basshylyqqa ala otyryp, 612-baby 3-bóligi boıynsha ákimshilik quqyq buzýshylyq jasaǵany úshin S-ny kináli dep tapty. Oǵan 184,6 myń teńge kóleminde ákimshilik aıyppul salyndy», - dep habarlady vedomstvodan.

Eske sala keteıik, budan buryn Oralda sot sheshimin elemegen salyq organynyń basshysy shyǵynǵa qalǵanyn jazǵan edik.