BQO-da sharýa qojalyǵynyń basshysy adamdardy quldyqta ustaǵan
BQO Polıtsııa departamentiniń baspasóz qyzmetinen málim etkenindeı, jaǵdaı Aqjaıyq aýdanynda anyqtalyp otyr.
Departamentke sharýa qojalyqtarynyń biriniń basshysy eńbekke paıdalaný úshin Oral qalasynyń turǵyndaryn zańsyz ustaǵany jóninde jedel aqparat túsken.
«BQO PD uıymdasqan qylmysqa qarsy is-qımyl basqarmasynyń qyzmetkerleri júrgizgen jedel izdestirý is-sharalary barysynda atalǵan derek rastaldy. Sonyń nátıjesinde Oral qalasynyń birneshe turǵyny polıtsııaǵa aryzben júgindi.
Fakti boıynsha QR Qylmystyq kodeksiniń 126-baby 3-bóligine (bas bostandyǵynan zańsyz aıyrý) sáıkes sotqa deıingi tergep-tekserý jumystary bastaldy. Ózge aqparat QR Qylmystyq is júrgizý kodeksiniń 201-babyna sáıkes jarııalaýǵa jatpaıdy», - dep habarlady vedomstvodan.
Atalmysh bap boıynsha aıypty dep tanylǵan adam múlki tárkilenip nemese onsyz, bes jyldan on jylǵa deıingi merzimge bas bostandyǵynan aıyrýǵa jazalanady.