BQO-da saıası qýǵyn-súrgin qurbandaryn aqtaý jaıly jańa kitaptar tanystyryldy

ORAL. QazAqparat – Batys Qazaqstan oblysynda saıası qýǵyn-súrgin qurbandaryn aqtaý baǵytynda naqty jumys atqarylyp jatyr. Bul týraly Saıası qýǵyn-súrgin jáne asharshylyq qurbandaryn eske alý kúnine oraı oblys ákimi Narıman Tóreǵalıevtiń qatysýymen «Batys Qazaqstandaǵy saıası qýǵyn-súrgin saıasatynyń nátıjeleri: tarıh pen tulǵa» degen taqyrypta uıymdastyrylǵan dóńgelek ústel otyrysynda aıtyldy, dep habarlaıdy QazAqparat tilshisi.

M.Ótemisov atyndaǵy Batys Qazaqstan ýnıversıtetinde ótken is-sharany ashqan saıası qýǵyn-súrgin qurbandaryn tolyq aqtaý jónindegi óńirlik komıssııanyń jumysyn súıemeldeý boıynsha jumys tobynyń jetekshisi Jantas Safýllın 2020 jyldan beri kóptegen jumystardyń qolǵa alynǵanyn málim etti.

«Memleket basshysynyń saıası qýǵyn-súrgin qurbandaryn tolyq aqtaý jónindegi Jarlyǵyn oryndaý maqsatynda óńirlik komıssııa jumys jasap keledi. Onyń nátıjesi de joq emes. Aıtalyq, 2022 jyldyń ózinde 7 kitap basylyp shyqty. Bulardyń úsheýi monografııalyq eńbek bolsa, ekeýi arhıv qujattaryna arnalǵan, ekeýi – anyqtamalyq. Qazirgi tańda Prezıdent Jarlyǵyna sáıkes barlyq arhıv qujattaryn qarap, zertteýge tolyq bar. Sondyqtan arnaıy qurylǵan jumys toptary saıası qýǵyn-súrgin qurbandaryn aqtaý jolyndaǵy isterin jalǵastyra beredi», - dedi J.Safýllın.

Dóńgelek ústel otyrysynda oblys ákimi Narıman Tóreǵalıev ótken ǵasyrdyń jıyrmasynshy jyldarynan bastalǵan saıası qýǵyn-súrginniń elimizge buryn-sońdy bolmaǵan qasiret ákelgendigin atap ótti.

«Bul oraıda óńirlik komıssııalardy qurýdyń negizgi maqsaty - Memleket basshysynyń Jarlyǵy aıasynda usynystar ázirleý úshin osy ýaqytqa deıin qupııa bolyp kelgen nemese áli belgisiz, umytylǵan derekterdi, faktilerdi tabý, jınaý, repressııanyń túrleri men mehanızmderin anyqtaý, aýyldardaǵy qýǵyn-súrgin ortalyqtary men oryndaryn, qurbandardyń sanyn, aty-jónin anyqtaý jáne zardap shekkender týraly osy máselege qatysty basqa da aqparat jınaý, taldap-saraptaý bolatyn. Sońǵy eki jyl kóleminde osy mindetterdi abyroımen atqaryp kele jatqan óńirlik komıssııa músheleri, ǵalym-zertteýshiler buryn jabyq bolǵan arhıv qorlaryn zerttep, tyń derekterge qol jetkizdi. Tarıhı ádilettilikti qalpyna keltirý boıynsha qurylǵan óńirlik komıssııa, onyń 7 jumys toby arnaıy baǵyttar boıynsha zertteý júrgizip, saıası qýǵyn-súrgin qurbandaryn zańdy jáne saıası aqtaý úshin arhıv materıaldaryn, tarıhı derekter men qujattardy jınady», - dedi óńir basshysy.

Onyń sózine qaraǵanda, 2021 jyldan bastap óńirlik komıssııanyń ǵylymı-zertteý jumystaryna, baspa qyzmetine, ǵalym-mamandardyń eńbekaqysy men ǵylymı is-saparlaryna oblystyq bıýdjetten qajetti qarjylyq qoldaý kórsetilýde.

Nátıjesinde Almaty, Astana qalalaryna is-saparlar uıymdastyrylyp, arhıvter men ǵylymı ortalyqtarda úlken jumys jasaldy.

Respýblıkalyq, oblystyq jáne aýdandyq arhıvterdegi jumys barysynda 300-den astam is qaralyp, 6 myń betteı qujat kóshirmeleri alynǵan.

«Osy ýaqyt aralyǵynda óńirlik komıssııanyń 6 otyrysy, jumys tobynyń 15 otyrysy ótkizildi. Óńirlik komıssııamen 1 respýblıkalyq jáne 2 oblystyq ǵylymı-praktıkalyq jáne ádistemelik konferentsııa, 1 respýblıkalyq semınar uıymdastyryldy. 2021 jyly 2 taqyryptyq baǵyt boıynsha 2 jınaq, 2022 jyly 5 taqyryptyq baǵyt boıynsha óńirlik deńgeıde 5 jınaq jáne respýblıkalyq kóptomdyqqa 2 jınaq engizilip, jalpy sany 9 kitap jaryq kórdi», - dedi N.Tóreǵalıev.

Dóńgelek ústel otyrysynda saıası qýǵyn-súrgin qurbandaryn aqtaýǵa baılanysty jaryq kórgen jeti kitaptyń tanystyrylymy boldy.