BQO-da rýhanı jańǵyrýǵa qatysty birneshe joba qolǵa alynady
Bul týraly BQO ákimdiginde oblys ákimi Altaı Kólginovtiń tóraǵalyǵymen ótken jıynda aıtyldy, dep habarlaıdy «QazAqparat» tilshisi.
Aldymen oblys ákiminiń birinshi orynbasary Arman Óteǵulov QR Prezıdenti janyndaǵy Memlekettik basqarý akademııasynda «Rýhanı jańǵyrý» baǵdarlamasyn jobalyq basqarý negizinde júzege asyrý boıynsha arnaıy oqý ótkeni jóninde málim etti. Oǵan BQO-dan oblys basshysynyń birinshi orynbasary bastaǵan birqatar basqarmalar basshylary men sarapshylar qatysyp qaıtty. Prezıdent Ákimshiligi basshysynyń orynbasary Ońdasyn Orazalın jáne basqa laýazymdy qyzmetkerler qatysqan semınarda jobalyq menedjmenttiń teorııasy jáne ony «Rýhanı jańǵyrý» baǵdarlamasynda qalaı paıdalanýǵa bolatyny jóninde tájirıbeler ortaǵa salynyp, trenıngter ótkizildi. Endi Memlekettik basqarý akademııasynyń mamandarynyń qatysýymen óńirde maýsym-shilde aılarynda oqytý semınarlaryn uıymdastyrý josparlanýda.
Semınardaǵy taǵy bir jańalyq, memlekettik jobalardy ortalyqtandyrylǵan túrde júzege asyrý úshin Jobalyq keńse qurý máselesi boldy. BQO-daǵy keńse jetekshisi bolyp taǵaıyndalǵan oblystyq máslıhat depýtaty, «Bolashaq» korporatıvtik qorynyń dırektory Saltanat Tumanbaevanyń aıtýynsha, atalmysh keńse bıylǵy 1 qazannan bastap iske kirispek. Oǵan deıin uıymdastyrý máseleleri sheshilip, jobalardyń jol kartasy jasalatyn bolady.
Delegatsııa quramynda bolǵan BQO ishki saıasat basqarmasynyń basshysy Baqytjan Narymbetov «Týǵan jer» memlekettik baǵdarlamasyn júzege asyrý úshin birtutas respýblıkalyq ǵalamtor portalyn qurý kerektigin jetkizdi. Onyń sózine qaraǵanda, Batys Qazaqstanda tarıhı eskertkishter men kıeli oryndar, qoryqtar barshylyq. Óńirdiń tabıǵaty da erekshe. Sondyqtan munyń bárin esepke alyp, bir júıege keltirý kerek. Bul jumysqa oblys jýrnalısteri, fotosýretshiler men beıneoperatorlar tartylatyn bolady. Oǵan qosa «Jomart júrek» jobasy iske qosylyp, jyl boıyna óziniń týǵan jerin túletýge úles qosqan kásipkerler men demeýshiler marapattalady.
«Týǵan jer» baǵdarlamasyn júzege asyrý máseleleri boıynsha oblystyq mádenıet, muraǵattar jáne qujattama basqarmasynyń basshysy Dáýletkereı Qusaıynov, sondaı-aq aýdan ákimderi óz oı-josparlarymen bólisti. Mysaly, Bórli aýdanynda josparlanǵan sharalardy júzege asyrýǵa 65 mln. teńge qajet. Sonyń ishinde kóne qulpytastardan ashyq aspan astyndaǵy mýzeı jasaýǵa bolady. Al Syrym aýdanynda tarıhı úılerdi qalpyna keltirý, jańa nysandar salý jáne «Syrym eliniń tarıhı oryndary» atty kitap shyǵarý oılastyrylýda.
Jıyndy qorytyndylaǵan oblys basshysy «Rýhanı jańǵyrý» baǵdarlamasyna sáıkes jobalardy qala ǵana emes, aýyl-aımaqta keńinen qolǵa alý baǵytynda tapsyrmalar berdi.