BQO-da Reseı shekarasynan Qazaqstanǵa ótken 8 adamnan koronavırýs anyqtaldy

ORAL. QazAqparat – Batys Qazaqstan oblysynda 6-14 qazan aralyǵynda Reseımen shekaradaǵy avtoótkelderden Qazaqstanǵa 4942 adam ótti, dep habarlaıdy QazAqparat tilshisi.

BQO Taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵalı Aryspaevtyń málim etkenindeı, sonyń 1287-si – jolaýshylar. Olardyń arasyndaǵy 951 jolaýshynyń qolynda COVID-19-ǵa tekserýden ótkeni jóninde anyqtamasy bolǵan. Anyqtamasy joq 358 adam túgeldeı eki táýlikke karantındik statsıonarǵa jatqyzyldy. Sonyń ishinde 8 adamnyń koronavırýs juqtyrǵany belgili boldy. Bulardyń beseýi – «Syrym», ekeýi «Tasqala», bireýi «Aqsaı» beketinen ótken.

Anyqtamasy joq 56 sheteldik azamat keri qaıtaryldy.

Sońǵy táýlikte shekaradan 508 adam ótse, sonyń 146-sy – jolaýshylar. Anyqtamasy joq 26 adam karantındik statsıonarǵa jatqyzyldy. Úsheýinen indet tabyldy.

Aıta keteıik, Batys Qazaqstan oblysy Reseıdiń bes oblysymen shektesedi.

Shekarada turǵan 4 avtoótkelde sanıtarlyq-karantındik beketter bar. Onda epıdemıolog mamandar saýalnama júrgizip, kelgenderdiń qyzýyn ólshep, anyqtamasynyń bar-joǵyn tekserýde.

«Kórshiles Reseı elinde koronavırýstyń órshı túsýi alańdatady. Tek sońǵy táýlikte 14 myń adamnan indet anyqtalyp otyr. Sondyqtan shekaralarda karantındik sharalar kúsheıtiledi. Qazirgi kezde jańa qaýly ázirlenýde», - dedi M.Aryspaev.

Eske sala keteıik, budan buryn BQO-da koronavırýstan qaıtqandardyń 70 paıyzdan astamy egde adamdar ekendigin jazǵan bolatynbyz.

Sondaı-aq indet anyqtalǵan balabaqsha karantınge jabyldy.