BQO-da prokýrordyń telefonyna aqsha salǵan polıtseı 353 myń teńge aıyppul tóledi
QR Sybaılas jemqorlyqqa qarsy is-qımyl agenttigi BQO boıynsha departamentinen túsken málimetke qaraǵanda, oblystyq polıtsııa departamenti is-qaǵaz júrgizý bólimi jetekshi mamanynyń mindetin atqarýshy osyndaı qadamǵa barǵan.
Ol bıylǵy 7 mamyrda departamenttiń 4 aıdaǵy tekserý aktileri boıynsha esepke qol qoıýdy tezdetý jáne odan ári oń iskerlik qatynasty retteý úshin BQO prokýratýrasy quqyqtyq statıstıka jáne arnaıy esepke alý basqarmasynyń aǵa prokýrorynyń telefon nómirine 1 myń teńge aqsha aýdarǵan.
Oǵan qosa «Qaıyrly kún. BQO DP tekserý aktisine qol qoıylǵanyn bilýge bola ma?», «Anda Sizge alǵys esebinde balansqa aqsha saldym. Aktiler boıynsha jaýap berýińizdi ótinemin. Rahmet» degen habarlama jazyp jibergen.
Aǵa prokýror bul jóninde óziniń basshylyǵyna baıan etip, 1 myń teńgeni jergilikti bıýdjetke aýdarǵan.
Oral qalasy mamandandyrylǵan ákimshilik sotynyń qaýlysymen BQO polıtsııa departamentiniń jetekshi mamany QR Ákimshilik quqyq buzý kodeksi 676-babyna (jeke tulǵalardyń zańsyz materıaldyq syıaqy berýi) sáıkes aıypty dep tanylyp, oǵan 353 500 teńge ákimshilik aıyppul salyndy.
Oral qalasy boıynsha memlekettik kirister basqarmasy májbúrlep óndirý bóliminiń bas mamanynyń da telefonyna belgisiz bireý 2 myń teńge salyp jibergen.
Ol otbasy músheleri men týma-týysqandarynan surastyryp, eshkimniń aqsha salmaǵanyn bilgen. «Bılaın» abonentterdi qoldaý qyzmetine habarlasqan kezde olar aqshany kim salǵanyn aıta almaıtynyn jetkizgen. Sodan keıin bul qyzmetker de 2 myń teńgeni jergilikti bıýdjetke aýdarǵan.
Aıta keteıik, zańsyz syıaqydan bas tartqan qos memlekettik qyzmetker de QR Sybaılas jemqorlyqqa qarsy is-qımyl agenttigi tóraǵasynyń orynbasary Nurlan Shabdardyń alǵyshatymen marapattaldy.