BQO-da polıtseı júkti áıeldi qutqardy

ORAL. QazAqparat - Batys kólik polıtsııasynyń qyzmetkeri bosanǵaly jatqan júkti áıeldi aýrýhanaǵa jetkizip, qutqaryp qaldy, dep habarlaıdy QazAqparat tilshisi.

QR ІІM Kóliktegi polıtsııa departamentiniń baspasóz qyzmetinen túsken málimetke qaraǵanda, oqıǵa 6 aqpan kúni Qazaqstan stantsııasynan (Aqsaı qalasy) 3-4 shaqyrym jerde boldy.

Aıza Joldaspaeva kúıeýi Nurbolmen birge Oral-Almaty jolaýshylar poıyzymen Aqtóbege bara jatqan. Alaıda Qazaqstan stantsııasynan shyqqannan keıin 8 aılyq júktiligi bar 38 jastaǵy áıelden qan ketip, jaǵdaıy kúrt nasharlaǵan. Poıyz sol boıda toqtap, mashınıst-dıspetcher shuǵyl kómek kerektigin habarlaǵan.

Oqıǵa ornyna Qazaqstan stantsııasyndaǵy jelilik polıtsııa bóliminiń bastyǵy Muqataı Aıapov birinshi bolyp jetken. Poıyz dalada turǵandyqtan, oǵan jedel járdem kóligi jete almaıtyn edi.

Polıtsııa podpolkovnıgi Muqataı Aıapov kúrtik qarǵa qaramastan, áıeldi kóterip alyp shyǵyp, avtokóligimen Bórli aýdandyq ortalyq aýrýhanasyna jetkizgen. Aýrýhanada áıelge kesar tiligimen ota jasalyp, dúnıege qyz bala keldi.

Nurbol Joldaspaev qazirgi kezde áıeli men qyzynyń jaǵdaıy jaqsy ekendigin aıtyp, kólik polıtsııasy qyzmetkerine alǵysyn bildirdi.