BQO-da paıdalanylmaı otyrǵan 310 myń gektar aýyl sharýashylyǵy jeri anyqtaldy
BQO jer qatynastary basqarmasynyń basshysy Nurjan Maqsotovtyń óńirlik kommýnıkatsııalar qyzmeti alańynda ótken brıfıngte málim etkenindeı, atalǵan jer tekserý júrgizý úshin oblystyq jer resýrstaryn paıdalaný departamentine joldandy.
Nurjan Erbolatulynyń sózine qaraǵanda, qazir sonyń 112,7 myń gektary memleket menshigine qaıtaryldy. Qalǵan 198,2 myń gektar jer telimderi boıynsha tekserý jumystary júrgizilip jatyr.
«Aýyl sharýashylyǵy maqsatyndaǵy jerlerdi aınalymǵa engizý asa mańyzdy. Bıyl osy kezge deıin jergilikti atqarýshy organdar jalpy kólemi 165,7 myń gektar 296 jer telimi boıynsha 35 konkýrs ótkizdi. Sonyń nátıjesinde 146,1 myń gektar bolatyn 251 jer telimi tabystaldy. Aldaǵy ýaqytta 29 jer telimi (10,3 myń ga) boıynsha 4 konkýrs ótkizilmek», - dedi N.Maqsotov.
Basqarma málimetine qaraǵanda, óńirde aýyl sharýashylyǵy maqsatyndaǵy jer kólemi 7897,9 myń ga bolsa, sonyń 620,5 myńy – egistik, 1,9 myńy – kópjyldyq ekpeler, 528,1 myńy – tyńaıǵan jer, 510,1 myńy – shabyndyq, 6180,6 myńy – jaıylym, 56,7 myńy – ózge jerler.
Basqarma basshysynyń aıtýynsha, bıylǵy sáýir aıyndaǵy esep boıynsha jeke qosalqy sharýashylyqtardaǵy mal basy sany negizinde 227 myń ga kóleminde jaıylym jerdiń jetispeýshiligi baıqalyp otyr.
Osy máseleni sheshý maqsatynda 430 970 ga jaıylymdyq jáne shabyndyq jer rezervke qoıyldy. 1048 ga jer májbúrlep ıelikten shyǵaryldy. Sondaı-aq aýyldyq okrýg ákiminiń apparattaryna 4356 ga turaqty jer paıdalanýǵa berildi. Oǵan qosa 141 785 ga jaıylym jer ýchaskeleri jer-sharýashylyq jobasy negizinde eldi meken jerleri sanatyna aýystyryldy.
Atalǵan jumystardyń nátıjesinde eldi mekender 578 159 ga (571 915 ga – jaıylym, 3771 ga – shabyndyq, 2473 ga – basqa jerler) qosymsha jaıylymdyq jáne shabyndyq alqaptarmen qamtamasyz etildi.