BQO-da para alǵan polıtsııa jáne kóliktik baqylaý qyzmetkerleri sottaldy

<p>Oral qalalyq sotynda Nurlan Berdiǵalıev, Rınat Týksýmbaev, Saıahat Tastileýov, Asylanbek Ǵalıev, Aleksandr Kalınıchev, Bolat Nyǵmetov, Dıas Seıtqalıev, Noıan Halelovqa qatysty úkim shyqty, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.&nbsp;</p>

BQO sotynyń baspasóz qyzmetinen túsken málimetke qaraǵanda, ishki ister organdarynan zeınetke shyqqan, resmı túrde jumys jasamaıtyn R.Týksýmbaev laýazymdy qyzmetkerlerge para berýge baǵyttalǵan qylmystyq jeli qurǵan.

Atap aıtqanda, R.Týksýmbaev BQO boıynsha kóliktik baqylaý ınspektsııasy, BQO polıtsııa departamenti men Oral qalasy polıtsııa basqarmasy patrýldik polıtsııa batalondary qyzmetkerlerine Reseıden kele jatqan, shamadan tys mólsherde astyq tıelgen júk kólikterin kedergisiz ótkizý úshin birneshe ret júıeli túrde para bergen.

Sonymen qatar QR AShM Agroónerkásiptik keshendegi memlekettik ınspektsııa komıteti Oral qalalyq aýmaqtyq ınspektsııasy qyzmetkerine de eshqandaı qaramastan karantındik fıtosanıtarııalyq baqylaý aktisin berý jáne QR Ákimshilik quqyqbuzýshylyq kodeksi 400-baby 1-bóligi 12-tarmaǵyna (karantınge jatqyzylǵan ákelinetin ónimdi mejeli pýnktinde qaıtalap karantındik jete tekserý úshin usynbaý) sáıkes ákimshilik jaýapkershilikke tartpaý úshin para bergen.

Sot úkimimen R.Týksýmbaev QR QK 367-baby 3-bóligi 3-tarmaǵyna sáıkes aıypty dep tanylyp, 7 jylǵa bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteýge sottaldy.

N.Berdiǵalıevke QR QK 366-baby 3-bóligi 4-tarmaǵyna sáıkes paranyń 60 eselengen mólsherinde 3,6 mln teńge aıyppul salyndy. Onyń bıylǵy 28 naýryzdan 9 qazanǵa deıin qamaýda bolý merzimi eskerilip, aıyppul kólemi 2 mln 691 myń teńgege deıin tómendetildi.

S.Tastileýovke 15 mln teńge kóleminde aıyppul salyndy. Onyń da qamaýda bolǵan merzimi eskerilip, aıyppul kólemi 2 mln 704,8 myń teńgege deıin tómendetildi.

A.Ǵalıevke QR QK 366-baby 2-bóligine sáıkes paranyń 50 eselengen kóleminde 500 myń teńge aıyppul salyndy.

QR QK 366-baby 1-1-bóligine sáıkes A.Kalınıchev paranyń 40 eselengen kóleminde 2,8 mln, D.Seıtqalıev 1 mln teńge aıyppul arqalady.

QR QK 366-baby 3-bóligi 4-tarmaǵyna sáıkes paranyń 60 eselengen mólsherinde N.Halenovke 1,8 mln teńge, B.Nyǵmetovke 2,4 mln teńge aıyppul kesildi.

Sottalýshylardyń barlyǵy memlekettik jáne kvazımemlekettik salada qyzmet atqarý quqyǵynan ómir boıyna aıyryldy.

Oǵan qosa S.Tastileýov polıtsııa maıory, N.Halenov polıtsııa kapıtany, A.Kalınıchev pen D.Seıtqalıev polıtsııa aǵa leıtenanty shenderimen qosh aıtysty.

QR QK 48-baby 3-bóligine sáıkes N.Berdiǵalıevten 60 myń, S.Tastileýovten 250 myń, A.Ǵalıevten 10 myń, A.Kalınıchevten 70 myń, B.Nyǵmetovten 40 myń, D.Seıtqalıevten 25 myń, N.Halenovten 30 myń teńge memleket paıdasyna tárkilendi.

Sot úkimi zańdy kúshine engen joq.