BQO-da ońtústik aýdandarǵa jol salýda óreskel kemshilikter anyqtalyp otyr
Óńirdiń eń shalǵaıda ornalasqan Bókeı ordasy men Jánibek aýdandaryn oblys ortalyǵymen jalǵastyratyn jol qurylysyn salý 2018 jyly aıtylyp, ony bastapqyda 2021 jyly bitirý kózdelgen edi.
Alaıda kesteden keshikken jol bıyl da aıaqtalmaı otyr. Atalǵan aýdandar turǵyndary kóktem jáne kúz kezinde jolǵa shyǵarda kún jaýyn-shashyndy bolmasa eken dep jandaryn shúberekke túıip otyrady.
Qazirgi tańda keıbir jerlerde jol qurylysy júrip jatqanymen, Kaztalov-Jánibek jolynyń 53-95 shaqyrymynda Jánibek aýdanynyń Kúıgenkól aýylyna deıin eshqandaı asfalt tóselmegen. Laısań kezde batyp jatqan avtokólikterdi jıi kórýge bolady.
Qurylys jumystary. Foto: instagram.com/bko_jolsapa
Máseleniń taǵy bir mańyzdy qyry – joldardyń sapaly salynýy.
«Jol aktıvteri sapasynyń ulttyq ortalyǵy» RMK BQO fılıalynyń dırektory Záýirbek Qypshaqbaevtyń aıtýynsha, atalǵan baǵytta jol qurylysy jumystary men materıaldaryna saraptama udaıy júrgizilip keledi.
Bıyl fılıal qyzmetkerleri 227 ret jolǵa shyǵyp, baqylaǵan kezde 200-ge jýyq aqaý anyqtalǵan. 598 materıal suryptalyp, 86 synama QR standarttaryna sáıkes kelmegen.
Atap aıtqanda, «Ónege-Bısen-Saıqyn» jolynyń 50-103 shaqyrymyn kúrdeli jóndeý ýchaskesinen (tehnıkalyq qadaǵalaý – «Álem 11» JShS, merdigeri – «Aqjol qurylys» JShS) óreskel aqaýlyqtar shyqqan. Munda joba talabyna (M1400) sáıkes kelmeıtin qıyrshyqtas qoldanylýda. Nysan basynda júrgizilgen komıssııalyq zerthanalyq jumystar barysyynda naqty beriktilik kórsetkishi M800 ekendigi belgili boldy. Fılıal zerthanasynda da osy kórsetkish rastalǵan.
Foto: instagram.com/bko_jolsapa
Záýirbek Qypshaqbaevtyń sózine qaraǵanda, asfaltobeton jamylǵysynyń sapasyn anyqtaý maqsatynda jasalatyn kern synamasyn suryptaý barysynda uzyndyǵy 500 metr astyńǵy qabat asfaltbeton jamylǵysyna qoldanylǵan. Ol 1700 negizgi qurylymǵa (ŞPTsS) paıdalanylatyn qospasyna aralastyrylǵan. Barlyq sapasyz atqarylǵan jumystarǵa uıǵarym berildi jáne qabyldaýǵa jaramsyz.
Sol sekildi «Kaztalov-Jánibek-RF shekarasy» avtojolynyń 95-138 shaqyrymynda (merdiger – «Temirjoljóndeý» JShS, ınjenerlik qyzmet – «Tehstroıkonsaltıng» JShS) asfalt jamylǵysynyń tyǵyzdyq koeffıtsenti sáıkes kelmeıdi.
Aınalma joldarda kútip ustaý, tegisteý jumystary durys júrgizilmegen, jamylǵyda joba talabyna saı kelmeıtin materıaldar jıi qoldanylady.
Qurylys jumystary men materıaldarynyń saraptamasy.
Foto: instagram.com/bko_jolsapa
«Kaztalov-Jánibek» avtojolynyń 53-95 shaqyrymynda Kúıgenkólge deıingi ýchaskede «QazAvtoJol» UK» AQ BQO fılıaly óz isin salǵyrt atqarǵany úshin «Temirjoljóndeý» JShS-men kelisimshartty buzdy. Osyǵan baılanysty 2022 jyly bul ýchaskedegi jumys turalap qaldy», dedi Záýirbek Qypshaqbaev.
«QazAvtoJol» UK» AQ Batys Qazaqstan oblystyq fılıalynyń basshysy Qazbek Mámbetov óz moınyna alǵan mindettemeni oryndamaǵan «Temirjoljóndeý» JShS-men kelisimsharttyń ótken jyly úzilgenin rastady.
«Bıyl eki ret tender oınatylyp, merdiger anyqtalmady. Tek tamyz aıynda ótkizilgen úshinshi tenderden keıin «ıÝnıserv» JShS-men kelisimshart jasaldy. Ázirshe merdiger kompanııa kezekshi tehnıkalaryn qoıyp, kútip ustaý jumystaryn júrgizýde. Materıaldar daıyndap, kelesi jyly sol ýchaskedegi jóndeý jumystaryn bastap ketedi», - dedi Qazbek Mámbetov.
Qurylys jumystary. Foto: instagram.com/bko_jolsapa
Onyń málim etkenindeı, birqatar problemalyq máselelerge qaramastan, jalpy alǵanda, ótken jylmen salystyrǵanda, alty ýchaskeden turatyn «Kaztalov-Jánibek-RF shekarasy» jáne «Ónege-Bısen-Saıqyn» avtojoldarynda bıylǵy qurylys-montajdaý jumystarynda ilgerileýshilik baıqalady.
«Qurylys jumystaryna jumyldyrylǵan arnaıy tehnıka men maman sany bıyl eki ese artty. Qazir eki nysanda 700 maman eńbektenip, 600 arnaıy tehnıka jumys isteýde. Jol qyzmetkerleriniń 90 paıyzy – jergilikti turǵyndar. Oǵan qosa 4 asfaltbeton zaýyty bar. Eger ótken jyly shamamen 41 shaqyrymǵa asfalt tóselse, bıyl 75 shaqyrymda sondaı jumystar atqaryldy. Atalǵan kúre joldardyń 122 shaqyrymynda qozǵalys qamtamasyz etildi», dedi Qazbek Mámbetov.
Oblys joldaryn salý men kúrdeli jóndeýde kedergi keltirip otyrǵan jaıttyń biri – bıtým men qıyrshyqtastyń jetispeýshiligi men olardy jetkizýdegi qıyndyqtar. Osy oraıda merdigerlerdiń de ýájin túsinýge bolady. Mysaly, qıyrshyqtas Aqtóbe oblysynan temirjol arqyly tasymaldanady. Jánibek pen Saıqyn stansalaryna jetkenshe 1300 shaqyrymdy baǵyndyrýǵa týra keledi. Osynyń ishinde 500 shaqyrymy Reseıdegi temirjol arqyly ótedi. Al reseılikter halyqaralyq talapqa saı kelmeıtin júk vagondaryn ótkizbeıdi.
Buǵan baılanysty Qazbek Mámbetov sol júk vagondaryn «QazAvtoJol» UK» AQ-ǵa berý kerektigin, sonda máseleni sheshýge bolatynyn jetkizdi.
«Bıtým Aqtaýdan júk kólikterimen tasymaldanýda. Qazirgi kezde kidiris joq. Qurǵaq bıtýmdy da qoldanýǵa bolady. Aldaǵy jyly jol jóndeý jumysyn ýaqtyly bastap ketý úshin jol qurylysy materıaldaryn qys kezinde daıyndap qoıýymyz qajet», dedi Qazbek Mámbetov.
Qoryta aıtqanda, shalǵaıdaǵy Jánibek jáne Bókeı ordasy aýdandaryn mekendeıtin jurtshylyq atalmysh jol tym bolmasa aldaǵy jyly bitse eken dep armandaıdy.
Bókeı ordasy aýdany turǵyndary oblys ortalyǵy – Oral qalasyna eki baǵytta qatynaı alady. Biri – Saıqyn-Bısen-Ónege-Kaztalov, ekinshisi – Saıqyn-Jańaqala arqyly. Áıtse de Jańaqala baǵytynda da qatqyl tabandy jol joq. Tek bıyldan bastap Jańaqaladan Bókeı ordasyna qaraı jol salý qolǵa alyndy. BQO jolaýshylar kóligi jáne avtomobıl joldary basqarmasynyń basshysy Aıdar Meńeevtiń sózine qaraǵanda, Jańaqala-Saıqyn baǵytyndaǵy jol qurylysyna bıyl 2,2 mlrd teńge bólindi. Ázirshe 8 shaqyrym jol salyndy.
Eske sala keteıik, budan buryn Bókeı ordasy men Jánibek aýdandaryna jol salynatynyn jazǵan bolatynbyz.
Sondaı-aq Bókeı ordasy jáne Jánibek aýdandaryna aparatyn jol 2019 jyly salyna bastaıdy dep habarlanǵan.
BQO-da alys aýdandarǵa jol salýǵa 20 mlrd teńge qarastyryldy.
Prezıdent Qasym-Jomart Toqaev uzaq jyldar boıy sheshilmeı kele jatqan Batys Qazaqstan oblysyndaǵy kúre joldar problemasyn sheshýdi tapsyrdy.
Memleket basshysynyń tapsyrmasynan keıin BQO-da jol salý jumysy qalaı júrip jatqanyn QazAqparat tilshisi de kórip qaıtqan bolatyn.
Basty foto: instagram.com/bko_jolsapa