BQO-da on kúnde jol apatynan 12 adam qaza tapty

<p>Batys Qazaqstan oblysynda jyl bastalǵannan bergi on kún ishinde jol apattarynan 12 adam qaza tapty, dep habarlaıdy <a href="https://kaz.inform.kz/?_gl=1*1cookbu*_ga*MTMxOTQ2NjU5MC4xNjk4Mzc1OTcw*_ga_Y44SMVECD5*MTY5ODM3NTk2OS4xLjAuMTY5ODM3NTk2OS42MC4wLjA.&amp;pk_vid=1dac2fba2c02ff6916983759715aaacc" target="_blank" rel="noopener">Kazinform</a>.</p>

BQO polıtsııa departamentiniń bastyǵy, polıtsııa polkovnıgi Arman Orazalıevtiń brıfıngte málim etkenindeı, 11 jol-kólik oqıǵasynan oǵan qosa 21 adam túrli jaraqat aldy.

«Bul ótken jyldyń eki aıynda bolǵan jol-kólik oqıǵalarymen teńesip otyr. Men óńirde jol qaýipsizdigi boıynsha tótenshe jaǵdaı oryn alyp otyr dep esepteımin. Mundaı jaǵdaı sońǵy 20 jylda bolmaǵan», dep atap ótti Arman Moldııaruly.

Departament bastyǵy jol apattarynyń júrgizýshilerdiń qarsy betke shyǵyp ketýinen bolatynyn jetkizdi.

Onyń sózine qaraǵanda, respýblıkalyq mańyzy bar avtojoldarǵa kún saıyn 47 patrýldik avtokólik shyǵyp, qaýipsizdikti baqylaıdy.

«Júrgizýshilerdiń kópshiligi patrýldik avtokólikti kórgen kezde jyldamdyqty azaıtyp, jol erejesi talaptaryn saqtaıdy. Al odan keıin talaptardy saqtamaı, apatqa urynyp jatady. Bul jerde árbir shaqyrymǵa patrýldik polıtsııa ekıpajyn qoıý múmkin emes. Bizdiń maqsatymyz – júrgizýshilerge aıyppul salý emes, kerisinshe jol apattarynyń aldyn alý, eskertý, profılaktıkalyq jumystar júrgizý», dedi A.Orazalıev.

Onyń aıtýynsha, sońǵy jol apaty 9 qańtar kúni oblystyq mańyzy bar Chapaev-Jańaqala-Saıqyn tas jolynyń 103-shaqyrymynda bolyp, 5 adam qaza tapty. Bulardyń tórteýi bir otbasy músheleri bolsa, kishkentaı 1 sábı aýyr jaraqatpen aýrýhanaǵa tústi.

«Bul jerde de júrgizýshi avtokóligimen qarsy betke shyǵyp ketip, aldan kele jatqan kólikpen túıisken. Oǵan qosa Hyundai Santa Fe júrgizýshisi kóliktiń dóńgelegin qysqy shınaǵa aýystyrmaǵan. ıAǵnı jazǵy dóńgelekpen júrgen. Polıtsııa qyzmetkerleri qarasha aıynan bastap júrgizýshilerge qysqy kezeńde dóńgelek aýystyrý kerektigin eskertse de, atalǵan júrgizýshi muny elemegen. Al qaıtys bolǵan otbasy músheleri rýli oń jaqta ornalasqan Toyota Estima avtokóliginde otyrǵan», dedi departament bastyǵy.

Ótken jyly oblysta 445 jol-kólik oqıǵasy bolyp, saldarynan 107 adam kóz jumyp, 540-y túrli jaraqat aldy.

Eske sala keteıik, budan buryn Batys Qazaqstanda jantúrshigerlik jol apatynan 5 adamnyń kóz jumǵanyn jazǵan bolatynbyz.

Sondaı-aq BQO-da 5 adam qaza tapqan jol apatyna tap bolǵan kishkentaı sábıdiń jaǵdaıy aýyr.