BQO-da «Nurly jol» aıasynda 2,5 mlrd. teńgege toǵyz joba qolǵa alyndy

ORAL. QazAqparat - Batys Qazaqstan oblysynda bıyl «Nurly jol» baǵdarlamasyna sáıkes 2,5 mlrd. teńgege toǵyz joba júzege asyrylýda, dep habarlaıdy «QazAqparat» tilshisi.

Oblys ákiminiń orynbasary Baǵdat Azbaevtyń sózine qaraǵanda, óńirdiń Aqjaıyq, Bórli, Zelenov jáne Syrym aýdandarynda 28,8 km jylý jáne 185,7 km sýmen qamtý jelileri qaıta qurylmaq. Osy jobalar márege jetken kezde 12 myńnan astam adam turatyn 8 eldi meken sapaly aýyz sýmen jáne Bórli aýdany ortalyǵy Aqsaı qalasynda 15 myńnan astam turǵyn jylýmen qamtamasyz etilmek.

«Kúni búgin barlyq nysandar boıynsha konkýrstyq rásimder aıaqtaldy. Endi merdiger kompanııalar iske kirisetin bolady», dedi B.Azbaev.

Aıta keteıik, Elbasy bastamasymen qolǵa alynǵan «Nurly jol» memlekettik baǵdarlamasy 2015 jyldan beri júzege asyrylyp keledi.