BQO-da neshe mektep jańadan salynyp jatyr

<p>ORAL. KAZINFORM &ndash; Batys Qazaqstan oblysynda mektepterdiń birqatary kúrdeli jóndelip, biraz bilim berý nysandary jańadan salynyp jatyr.&nbsp;</p>

BQO ákiminiń orynbasary Baqytjan Narymbetovtiń Kazinform tilshisine málim etkenindeı, oqý jyly aıaqtalysymen, mamyr aıynyń sońyndy 4 bilim berý nysanynyń kúrdeli jóndeý jumystary bastalady.

Baqytjan Haberulynyń sózine qaraǵanda, Oraldaǵy qara shańyraq – daryndy balalarǵa arnalǵan Sáken Seıfýllın atyndaǵy №11 oblystyq mamandandyrylǵan mektep-lıtseı-ınternatynyń bıyl ǵasyrlyq mereıtoıy atalyp ótilýde. Osyǵan oraı mekteptiń jıhazdary jańartyldy, endi ǵımarattyń ishi-syrty, ınjenerlik jelileri jańǵyrtylady.

«Oral qalasynyń ortalyǵynda oryn tepken №17 orta mektepte 1 800-ge oqýshy bilim alýda. Sol sekildi «Stroıtel» shaǵyndaýdanyndaǵy №9 orta mektepti de kúrdeli jóndeýden ótkizemiz. Munda 2 myń bala oqyp jatyr. Dına Nurpeıisova atyndaǵy mýzyka mektebi jańaryp qalady. Ózindik tarıhy bar mýzyka ordasyna bıyl 90 jyl tolǵaly otyr. Іshi-syrty qazirgi zamanǵy talaptarǵa saı retke keltirilse, ǵımarat talantty ónerpaz balalardyń tynysyn ashary anyq. Atalǵan 4 áleýmettik nysan «QPO b.v.» kompanııasynyń áleýmettik nysandary esebinen kúrdeli jóndeledi. Qazirgi kezde merdigerler anyqtalý ústinde. Sonymen qatar Jańaqala aýdanyndaǵy Karmanov mektebin kúrdeli jóndeýge qarajat bólindi, bul joba «Aýyl – el besigi» baǵdarlamasy aıasynda júzege asady. Jóndeýdi «Jaıyq Sıtı» kompanııasy júrgizýde», - deıdi B.Narymbetov.

Onyń aıtýynsha, sonymen qatar bıyl Memleket basshysynyń tapsyrmasymen «Jaıly mektep» ulttyq pılottyq jobasy aıasynda 9 mekteptiń qurylysy júrgizilýde.

Foto: "Jaıyq jaryǵy" JShS

Atap aıtqanda, Oral qalasynda «Balaýsa» shaǵynaýdanynda 1 500 oryndyq (merdigeri «BI Global» kompanııasy), Derkól kentinde 1 500 oryndyq («KazKanstrakshnGrýp») jáne medkolledj aýdanynda 600 oryndyq («Jaıyq jaryǵy» JShS) mektep salynýda.

Óńirdegi ekinshi qala – Aqsaıda M.Yqsanov kóshesinde 300, 7-shaǵynaýdanynda 900 oryndyq eki mektep boı kóterýde. Bul eki nysannyń merdigeri – «Altaır SK7». Oǵan qosa Bórli aýdany Pýgachev aýylynda «Jaıyq sıtı» qurylys kompanııasy 300 oryndyq mektep ǵımaratyn turǵyzýda.

Báıterek aýdanynda Baıqonys aýylynda 600 oryndyq («Antarıým grýp») jáne Dostyqta 1 200 oryndyq («Altım») jaıly mektep paıdalanýǵa beriletin bolady.

Oral qalasyna irgeles ornalasqan Terekti aýdany Podstepnyı aýylynda «SKF Otdelstroı» JShS 1 200 oryndyq mektepti bıyl salyp bitirýdi kózdep otyr.

«Sondaı-aq «Bilim berý ınfraqurylymyn qoldaý qory» esebinen Oral qalasynda «Altaır» kompanııasy 400 oryndyq №31 mektep qurylysyn bastap ketti. Budan bólek, «QPO b.v.» kompanııasynyń áleýmettik ınvestıtsııasy esebinen Bórli aýdany Jarsýat, Kaztalovtyń Saraljyn aýylynda shaǵyn jınaqty mektepterdiń qurylysyn qyrkúıekke deıin aıaqtaý josparlanýda. Sonda oblys boıynsha qazirgi tańda 8 myńnan astam balany qamtıtyn barlyǵy 12 mektep salynyp jatyr. Mektep qurylysy boıynsha basqa da josparlarymyz bar, sheshim qabyldanǵan kezde aıtylady», - dedi B.Narymbetov.

Oral qalasynda «Jaıly mektep» jobasy aıasynda salynyp jatqan nysannyń biri – medkolledj aýdanyndaǵy 600 oryndyq mektep. Bas merdiger – «Jaıyq jaryǵy» JShS dırektorynyń orynbasary, joba jetekshisi Maqsat Batyrbekov qazirgi tańda qurylystyń barynsha júrip jatqandyǵyn jetkizdi. Bul mektep qurylysyn bıyl aıaqtaý kózdelýde. Bilim ordasy ýaqtyly bitse, «Zachaganskıı» baý-baqsha seriktestiginde turyp jatqan balalar men olardyń ata-analary úshin úlken qýanysh bolary anyq.

Eske sala keteıik, budan buryn Batys Qazaqstanda «Jaıly mektep» jobasy qalaı júzege asyrylyp jatyrǵanyn jazǵan bolatynbyz.