BQO-da muzdaı sý keshken qutqarýshy: Biz qashanda elmen birgemiz
Óziniń aıtýynsha, Oral qalasynan Qaratóbe aýdanyna 27 naýryz kúni tańǵy saǵat 04.00-de 26 adam eki «KamAZ», bir «ÝAZ», 1 «Nıva Shevrole», 1 temir qaıyq jáne 1 tirkemeli motopompamen shyqqan.
— Saǵat 09.00 shamasynda Qaratóbege jetip, úsh topqa bólindik. Biz Shalǵyn eldi mekeni mańyndaǵy ózende muz keptelisi bar degen soń soǵan bardyq. Bir kún qonyp, jaǵdaıdy udaıy baqylap otyrdyq. 28 naýryz kúni ózen deńgeıi túsken soń túske taman aýdan ortalyǵy Qaratóbe aýylyna keri shyqtyq. Shóptikól aýyly tusynda Qaratóbe-Jympıty jolyn sý basyp ketken eken.
— Sózińdi bóleıin, beınetaspadaǵy sý keship kele jatqan eki adamnyń bireýi óziń be?
— Iá, men, ekinshisi — № 8 órt sóndirý bóliminiń bólimshe komandıri, azamattyq qorǵaý aǵa serjanty Qýanysh Qumarshıev. Ekeýmiz tehnıkanyń aldynan jol kórsetip júrdik. Qaladan otadan keıin er adam jedel járdem kóligimen qaıtyp kele jatyr eken. Sondaı-aq «ATAMEKEN» partııasy BQO fılıalynyń uıymdastyrýymen Qaratóbege gýmanıtarlyq kómek (dári-dármek, azyq-túlik, jyly kıim) tıelgen avtokólik, qalaǵa jarysqa bara jatqan balalar bar. Úsh ret solaı jaıaý júrip óttik. Keıin sýǵa ketken Qorjyn aýylynan evakýatsııalanǵan turǵyndardy kóshirdik. Barlyǵy 150-deı adamnyń sýdan aman ótýine járdemdestik. Sonyń ishinde 80-deıi — balalar.
— Al sýrette beınelengen úshinshi adam kim?
— BQO TJ departamenti órt sóndirý jáne avarııalyq qutqarý jumystaryn uıymdastyrý bóliminiń bastyǵy, azamattyq qorǵaý maıory Rýstam Qubashev.
— Turǵyndardy evakýatsııalaýǵa atsalysqan basqa da qutqarýshylar bar shyǵar?
— Árıne, men óz tobymdy aıta keteıin. Qaraýyl bastyǵy, azamattyq qorǵaý leıtenanty Eldar Opıev, aǵa nusqaýshy, azamattyq qorǵaý starshınasy Azamat Nurbekov, órt sóndirýshiler, azamattyq qorǵaý kishi serjanttary Mırlan Elýbaev, Ernur Sádiqulov, Dáýlet Maksımov.
— Sý salqyn shyǵar?
— Iá, biz jylynyp alyp, kezekpen aýysyp jumys istedik. 29 naýryz kúni keshke Sonaly aýyly jaqtan adamdar Qaratóbege jete almaı jatyr degen habar keldi. Joldy sý basyp ketken. Túngi saǵat 22.00-de shyǵyp, Sonalydan jaǵdaıy aýyr adamdy alyp kele jatqan jedel járdem kóligin ótkizdik. Bul joly bizdiń aldymyzdan Qaratóbe aýylyndaǵy № 18 órt sóndirý bóliminiń qyzmetkerleri, azamattyq qorǵaý kishi serjanttary Meıirbek Tilekqabylov pen Qaısar Ǵabdollaev júrip otyrdy. Odan bólek ishinde 4 bala, 1 aıaǵy aýyr kelinshek bar, 27 adamdy Qaratóbege jetkizdik.
— Mundaı jaǵdaı qyzmet babynda jıi bola ma?
— Jyl saıyn túrli oqıǵalarǵa tap bolamyz. Mysaly, sý tasqyny kezinde adamdardy qaıyqpen ótkizemiz. Maldy qaýipsiz jerge shyǵaramyz. Ózenderde muz keptelisi bolǵan kezde sonyń ortasyna shyǵyp, aǵysty jiberý úshin temir súımenmen oıamyz. Qaısybirin aıtýǵa bolady, ár túrli jaǵdaı boıynsha shyǵyp turamyz.
— Bir jaǵynan qaterli, bir jaǵynan qurmetti, osy mamandyqty tańdaýǵa ne túrtki boldy?
— Oǵan sebepshi bolǵan ata-anam der edim. Ákem Jumageldi Sultanov Aqtóbede tas zaýytynda, anam Maǵrıpa Oraldaǵy «Zenıt» zaýytynda jumys jasaıdy. Qarapaıym eńbek adamdary. Ózim Oral qalasyndaǵy № 45 mekteptiń túlegimin. 2008 jyly Kókshetaý qalasyndaǵy Málik Ǵabdýllın atyndaǵy azamattyq qorǵaý akademııasyna túsip, 2012 jyly bitirip shyqqannan keıin osy qyzmettemin.
— Senderdiń qyzmet ýaqyttaryńda shekteý joq shyǵar?
— Keıde 6-7 kúnge deıin úı kórmeı ketemiz. Jaǵdaıǵa qaraı kesh jatyp, erte turamyz. Mysaly, búgin túnde saǵat 02.00-de uıqtap, 04.30-da qaıtadan kúzetke shyqtyq. Qaratóbe aýylyndaǵy jergilikti kolledjdiń jataqhanasynda ornalasqanbyz.
— Úı demekshi, óz otbasyń týraly bir-eki aýyz sóz aıta ketseń?
— Kelinshegim Gúlim Qaıratqyzy oblystyq polıtsııa departamentinde jumys isteıdi, qazir sábı kútimimen otyr. Qyzym 11-de, ulym 10-da. Bıylǵy aqpanda taǵy bir ul bala kórindi. Gúlimniń ózi de quqyq qorǵaý salasynda bolǵannan keıin meniń qyzmetimdi jaqsy túsinedi, únemi qoldaý kórsetip otyrady.
— Osyndaı qıyn qyzmette bolǵannan keıin ózińdi babyńda ustaý úshin sportpen de aınalysasyń ba?
— Tap solaı. Qol tıgende, sport zalynan tabylamyz. Jarystarǵa qatysamyz. Aıtalyq, bıyl Ulystyń uly kúni — Naýryz merekesine oraı kúsh qurylymdary arasynda fýtzaldan Batys Qazaqstan oblysy ákiminiń aýyspaly kýbogi úshin ótkizilgen týrnırde jeńimpaz atandyq.
Sózimniń sońynda aıtarym, biz qashanda elmen birgemiz. Halqymyz bul qıyndyqtan da óter, tek bas amandyǵyn bersin deımin.
Qaratóbe aýdanynyń turǵyny Álibek Maqsotov eldiń atynan birneshe kúnnen beri tynbastan óz qyzmetin atqaryp jatqan qutqarýshylarǵa rızashylyǵyn bildirdi.
«Jigitterge rahmet. Er osyndaı syn saǵatta synalady. Sýyq sýdy jaıaý keship kele jatyrsyńdar. Halyq senderge óte rıza. Aman júrińder» dedi Á.Maqsotov.
Eske sala keteıik, budan buryn Batys Qazaqstanda taǵy bir aýyl turǵyndaryn evakýatsııalaý júrgizilip jatqanyn jazǵan bolatynbyz.